23:9  9  ARGUMENTUM  IN  GENESIN.  10  creaverit  quam  ita  visum  est.  Porro  quum  eius  voluntas  regula  sit  omnis  sapientiae,  ea  una  nos  contentos  esse  decet.  Recte  enim  Augustinus  iniuriam  Deo  a  Manichaeis  fieri  dicit  *),  quod  superiorem  eius  voluntate  causam  flagitent.  Prudenter  idem  admonet,  non  magis  de  infinitis  temporum  quam  locorum  spatiis  esse  inquirendum.  Nos  certe  non  ignoramus  finitum  esse  coeli  circuitum,  et  terram  instar  globuli  in  medio  locatam  esse.  Qui  non  citius  creatum  fuisse  mundum  indigne  ferunt,  expostulent  etiam  cum  Deo  quod  non  innumerabiles  mundos  fecerit.  Imo  quia  hoc  absurdum  ducunt,  multa  saecuia  praeteriisse  absque  mundo,  agnoscant  hoc  magnum  esse  naturae  suae  vitium,  quod  prae  immensa  vastitate  quae  vacua  manet,  exiguum  spatium  coelum  et  terra  occupant.  Nobis  vero,  quia  et  temporum  aeternitas,  et  gloriae  Dei  infinitas,  duplex  esset  labyrinthus,  haec  modestia  placeat,  ne  longius  progredi  appetamus  quam  Dominus  operum  suorum  ductu  ac  directione  nos  invitat.  Quod  autem  mundum  quasi  speculum  constituo,  in  quo  Deum  intueri  oporteat,  non  ita  volo  accipi  quasi  vel  nobis  satis  perspicaces  sint  oculi  ad  cernendum  quod  coeli  ac  terrae  fabrica  repraesentat:  vel  cognitio  qualis  inde  haberi  potest,  sufficiat  in  salutem.  Imo  quia  nullo  profectu  nos  Dominus  per  creaturas  ad  se  invitat,  nisi  quod  inde  inexcusabiles  reddimur  :  novum  remedium  (ut  opus  erat)  addidit,  vel  saltem  alio  subsidio  adiuvit  ingenii  nostri  ruditatem.  Nam  scriptura  duce  et  magistra,  quae  alioqui  nos  fugerent,  non  modo  demonstrat,  sed  prope  modum  adspicere  cogit  :  non  secus  ac  hebetes  oculi  specillis  adiuvantur.  Atque  in  hoc  (ut  iam  dictum  est)  Moses  incumbit.  Nam  si  mutum  coeli  et  terrae  magisterium  sufficeret,  supervacua  esset  Mosis  doctrina.  Accedit  igitur  hic  praeco,  qui  attentionem  nostram  excitat,  ut  sciamus  nos  ad  conspiciendam  Dei  gloriam  in  hoc  theatro  esse  collocatos:  neque  ut  testes  modo,  sed  etiam  ut  divitiis  omnibus  quae  hic  sunt  expositae  fruamur:  sicuti  eas  Dominus  usui  nostro  destinavit  ac  subiecit.  Nec  tantum  in  genere  Deum  mundi  esse  architectum  pronuntiat:  sed  toto  historiae  contextu  ostendit  quam  admirabilis  sit  eius  tum  potentia,  tum  sapientia,  tum  bonitas,  ac  praesertim  summa  erga  humanum  genus  sollicitudo.  Praeterea  quum  aeternus  Dei  sermo,  viva  et  expressa  sit  illius  effigies,  huc  nos  revocat.  Ita  efficitur  quod  docet  Apostolus,  non  aliter  quam  fide  intelligi  aptata  fuisse  verbo  Dei  saecuia.  (Heb.  l  l  ,  3.)  Proprie  enim  ex#eo  nascitur  fides,  quod  edocti  Mosis  ministerio  non  iam  vagamur  in  speculationibus  stultis  et  evanidis  :  sed  verum  et  unicum  Deum  in  genuina  sua  imagine  contemplamur.  Obiici  tamen  potest,  his  videri  consentaneum  quod  Paulus  tradit:  Postquam  in  sapientia  Dei  non  cognovit  mundus  per  sapientiam  Deum,  visum  Deo  esse  per  stultitiam  praedicationis  salvos  facere  credentes.  (1.  Cor.  1,  21.)  Nam  ita  innuit,  frustra  Deum  quaeri  rerum  visibilium  ductu:  nec  vero  aliud  restare  nisi  ut  recta  nos  ad  Christum  conferamus.  Non  igitur  ab  elementis  mundi  huius,  sed  ab  evangelio  faciendum  est  exordium,  quod  unum  Christum  nobis  proponit  cum  sua  cruce,  et  in  eo  nos  detinet.  Respondeo,  frustra  quidem  in  mundi  opificio  philosophari,  nisi  qui  evangelii  praedicatione  iam  humiliati,  totam  mentis  suae  perspicaciam  crucis  stultitiae  (ut  Paulus  nominat  1.  Cor.  1,  21)  subiicere  didicerint:  sursum,  inquam,  et  deorsum  nihil  reperiemus  quod  nos  ad  Deum  usque  attollat,  donec  in  sua  schola  nos  Christus  erudierit.  Id  porro  fieri  non  potest  nisi  ex  profundis  inferis  emersi  crucis  eius  vehiculo  supra  coelos  omnes  tollamur:  ut  illic  fide  comprehendamus  quae  oculus  nunquam  vidit,  auris  nunquam  audivit,  et  quae  longe  corda  mentesque  nostras  superant.  Neque  enim  illic  terra  nobis  obiicitur  quae  fruges  velut  in  diurnum  alimentum  suppeditet,  sed  Christus  ipse  in  vitam  aeternam  se  nobis  offert:  nec  coelum  solis  ac  stellarum  fulgore  oculos  corporales  illustrat,  sed  idem  Christus,  lux  mundi  et  sol  iustitiae,  in  animis  nostris  refulget:  nec  aer  inane  spatium  nobis  ad  spirandum  porrigit,  sed  ipse  Dei  spiritus  nos  vegetat  et  vivificat.  Denique  illic  invisibile  Christi  regnum  omnia  occupat,  et  spiritualis  eius  gratia  per  omnia  diffusa  est.  Verum  hoc  non  obstat  quominus  sensus  1)  De  Genesi  contra  Manichaeos.  Lib.  II.  de  Civitate  Dei.