46:898  rendre  plus  inexcusable.  Et  voyla  pourquoy  Dieu  resveille  les  consciences  endormies,  qui  veulent  reietter  tout  ioug,  et  les  rameine  et  incite  a  penser  a  eux  de  plus  pres,  tellement  qu'en  despit  de  leurs  dents,  il  faut  qu'ils  cognoissent  leurs  povretez,  et  qu'ils  sentent  leurs  vices,  combien  qu'ils  s'y  veulent  endormir.  Tous  les  scrupules  donc  qu'ont  tous  les  contempteurs  de  Dieu,  et  tous  les  meschans,  ce  sont  autant  d'adiournemens  que  Dieu  leur  fait  pour  leur  oster  toute  excuse  d'ignorance  :  Mais  puis  apres  ils  se  laschent  la  bride,  et  se  iettent  a  l'abandon,  et  si  ne  sont  nullement  retenus  :  comme  nous  voyons  en  Pilate.  Du  commencement  il  est  bien  estonne,  mais  tantost  apres  il  revient  a  son  naturel.  Et  ne  scais-tu  pas  (dit-il  a  Iesus  Christ)  que  i'ay  puissance  de  t'absoudre  ou  de  te  condamner?  Yci  en  premier  lieu  notons,  quand  ce  seroit  un  brigand,  qu'il  ne  pourroit  point  neantmoins  remuer  un  doigt  que  Dieu  ne  luy  donnast  la  puissance.  Comment  donc  est-ce  que  Pilate  ose  bien  amener  une  telle  licence  et  si  desbordee,  de  condamner  et  absoudre  a  son  appetit  et  a  sa  poste  ?  Car  il  voudroit  mieux  que  la  bride  fust  laschee  a  tous  brigans,  et  qu'ils  eussent  liberte  d'exercer  leur  cruaute  par  les  bois,  que  d'asseoir  en  un  siege  si  honorables  des  gens  qui  se  plaisent  en  leur  puissance,  sans  penser  a  la  conscience,  et  que  cependant  ils  mettent  toute  confusion  au  monde.  Or  yci  nous  voyons  (comme  i'ay  monstre)  qu'il  n'y  a  point  eu  une  racine  vive  en  Pilate,  mais  une  bouffee  seulement.  Ainsi  donc  apprenons  de  tellement  craindre  Dieu  qu'il  y  ait  une  ferme  constance  en  nous  de  cheminer  en  son  obeissance,  et  que  nous  bataillions  vertueusement  contre  tout  ce  qui  nous  pourroit  destourner,  et  que  tousiours  ceste  bride  nous  retiene,  qu'il  n'est  point  question  de  provoquer  l'ire  de  celuy  qui  ha  toute  puissance  sur  nous.  Voyla  en  somme  ce  que  nous  avons  a,  retenir.  Et  cependant  aussi  il  y  a  a  considerer  comment  la  gloire  que  Pilate  s'attribue,  luy  est  neantmoins  une  grande  honte.  Car  ses  ennemis  ne  luy  pouvoyent  pis  reprocher  que  cela,  ascavoir  qu'il  veut  estre  tenu  et  repute  n'avoir  aucune  discretion  de  bien  et  de  mal:  et  neantmoins  il  s'en  vante.  Nous  voyons  donc  d'autant  plus  que  les  contempteurs  de  Dieu  cuident  s'eslever,  qu'il  faut  qu'ils  se  sentent  tousiours  estre  plus  abysmez  en  confusion  :  et  Dieu  les  met  tellement  en  sens  reprouve,  qu'ils  font  leurs  vanteries  de  leurs  iniquitez,  afin  de  se  rendre  detestables  et  au  ciel  et  a  la  terre.  Qu'est-il  donc  de  faire?  Apprenons  de  nous  glorifier  en  bien,  et  que  nous  regardions  ce  qui  nous  est  licite.  Car  ceux  qui  se  glorifient  en  leur  grandeur,  il  est  certain  qu'ils  provoquent  Dieu,  d'autant  qu'ils  ont  acquis  leurs  richesses  et  leur  credit  souventesfois  par  moyens  illicites,  par  exces,  par  cruautez,  et  toutes  57