46:896  les  Princes  et  les  Magistrats.  Par  plus  forte  raison  donc  Iesus  Christ,  qui  estoit  oinct  en  perfection  des  graces  et  vertus  du  sainct  Esprit,  se  pouvoit  bien  appeler  Fils  de  Dieu.  Mais  quand  il  n'eust  point  este  Redempteur  du  monde,  et  s'appeler  Fils  unique  de  Dieu  par  excellence,  cela  estoit  un  crime  mortel  a  la  verite.  Mais  comment  est-ce  que  les  Iuifs  l'accusent  de  cela?  C'est  en  premier  lieu  pour  l'ignorance  de  l'Escriture,  d'autant  qu'ils  ne  cognoissent  pas  que  celuy  qui  devoit  estre  le  Redempteur,  devoit  estre  manifeste  le  Dieu  vivant.  D'autant  donc  qu'ils  n'ont  point  l'intelligence  de  l'Escriture,  et  qu'ils  ne  s'y  estoyent  point  exercez,  mais  s'estoyent  abbrutis  par  leur  nonchalance,  voyla  pourquoy  ils  sont  tant  hardis  a  condamner  Iesus  Christ.  Maintenant  nous  voyons  une  temerite  semblable  en  tous  ignorans.  Auiourd'huy  quand  on  criera,  Heretique  :  ce  n'est  pas  qu'on  ait  les  probations  en  main:  mais  les  plus  hebetez  sont  poussez  d'une  telle  rage,  qu'ils  veulent  estre  zelateurs  de  l'honneur  de  Dieu,  et  ne  scavent  ni  pourquoy  ni  comment.  D'avantage  il  faloit  s'enquerir  si  Iesus  estoit  Christ  le  Messias  ou  non.  Mais  les  Iuifs  l'ont  reiette  sans  faire  inquisition  aucune.  Apprenons  donc  par  cela,  si  nous  voulons  avoir  un  zele  que  Dieu  approuve,  qu'il  nous  faut  estre  reglez  en  droite  science,  et  estre  enseignez  par  sa  Parolle.  Car  nous  pourrons  escumer  nos  bouillons,  mais  ce  ne  seront  qu'autant  de  furies  de  Satan,  si  nous  ne  parlons  comme  escholiers  de  Dieu:  pource  qu'il  est  luy  seul  Iuge  competent,  et  se  reserve  cest  office-la  de  nous  monstrer  quelle  est  sa  volonte.  Puis  qu'ainsi  est  donc,  que  nous  ensuyvions  la  Parolle  de  Dieu  simplement,  et  aussi  que  nous  soyons  paisibles:  et  puis  que  nostre  zele  soit  regle  a  cela.  C'est  ce  qu'il  nous  faut  observer  en  premier  lieu.  Mais  quand  il  est  dit  que  Pilate  a  craint  plusque  iamais  oyant  parler  du  Fils  de  Dieu:  yci  nous  voyons  en  la  personne  d'un  povre  Payen  quelque  semence  de  religion  qui  l'esmeut,  et  le  pieque,  et  luy  sollicite  sa  conscience,  tellement  qu'il  ne  scait  de  quel  coste  se  tourner.  Il  voit  la  Iesus  Christ  tout  desfigure,  et  mesmes  desia  il  l'avoit  fait  fouetter:  il  avoit  eu  auparavant  tant  d'opprobres  et  ignominies,  tant  de  crachats,  tant  de  soufflets  lesquels  luy  avoyent  este  donnez  en  la  maison  de  Caiphe:  brief,  voyla  un  homme  qui  est  mesprise  et  reiette  de  tous:  et  tant  y  a  neantmoins  que  le  nom  de  Dieu  esmeut  Ponce  Pilate,  et  luy  engendre  frayeur  et  estonnement.  Que  sera-ce  donc  quand  nous  serons  comme  bestes  sauvages?  Et  quand  on  nous  parlera  de  Dieu,  si  nous  ne  sommes  nullement  retenus  d'aucune  bride,  ne  faudra-il  pas  que  l'exemple  de  Pilate  nous  condamne  au  dernier  iour?  Nous  verrons  auiourd'huy  des  mocqueurs,  gens  endiablez  du  tout,  si  on  leur  propose,  Voyla  que  Dieu