46:894  estrange  que  nostre  Seigneur  Iesus  soit  ainsi  vilipende,  et  qu'un  brigand  et  un  meurtrier  soit  plus  privilege  que  luy  :  qu'il  trouve  plus  de  grace  entre  les  hommes,  et  que  Iesus  Christ  ait  eu  une  telle  honte  et  ignominie.  Car  n'estoit-ce  pas  assez  que  le  Fils  de  Dieu  fust  crucifie,  et  qu'il  endurast  une  espece  de  mort  plene  d'opprobre,  outre  ce  qu'il  y  avoit  de  grans  tourmens?  Car  la  mort  de  la  croix  c'estoit  comme  la  punition  des  brigans:  ce  n'estoit  pas  seulement  comme  seroit  auiourd'huy  le  gibbet,  mais  c'estoit  comme  la  roue.  N'estoit-ce  pas  assez  donc  que  Iesus  Christ  apres  avoir  este  fouette,  et  qu'on  luy  a  crache  au  visage,  fust  mene  la  iusques  aux  abysmes,  sans  qu'il  ait  falu  que  par  comparaison  il  ait  este  monstre  execrable  a  tout  le  monde?  Car  si  nous  iugeons  de  nostre  sens,  et  que  nous  ne  iettions  nostre  regard  qu'a  ce  qui  apparoist,  il  est  vray  que  nous  serons  la  confus,  mais  il  nous  faut  eslever  les  yeux  de  la  foy  plus  haut,  et  venir  a  ce  que  nous  avons  touche  par  ci  devant:  c'est  ascavoir  que  Dieu  a  gouverne  tout  ceci  par  son  conseil.  Ne  nous  arrestans  pas  donc  a  ce  que  le  peuple  a  fait  avec  Pilate:  mais  contemplons  ce  decret  immuable  de  Dieu,  c'est  que  pour  mieux  nous  humilier,  il  a  voulu  que  son  Fils  fust  ainsi  abysme  en  toute  confusion,  et  qu'il  fust  mesmes  mis  au  dessous  de  tous  les  malfaiteurs  du  monde:  comme  il  a  este  crucifie  entre  deux  brigans,  selon  que  nous  verrons  ci  apres.  Voyla  donc  ce  que  nous  avons  a  observer,  quand  il  est  yci  dit  qu'il  a  falu  que  Barabbas  fust  delivre,  et  Iesus  Christ  mis  la  comme  le  plus  detestable  du  monde.  Or  Pilate  encores  apres  tout  cela  tasche  de  faire  eschapper  nostre  Seigneur  Iesus:  mais  par  un  moyen  diabolique,  c'est  ascavoir  qu'il  le  fouette  (ce  qu'on  appeloit  alors  chastier)  et  l'eust  voulu  lascher  apres  l'avoir  ainsi  chastie,  comme  celuy  qui  avoit  commis  quelque  faute:  car  par  cela  il  pretendoit  d'appaiser  le  trouble  du  peuple.  Or  si  nostre  Seigneur  Iesus  fust  ainsi  eschappe,  qu'eust-ce  este  de  l'Evangile,  et  qu'estoit-ce  du  salut  du  monde?  Car  ceste  correction  que  Pilate  appeloit,  eust  este  une  marque  de  honte  a  iamais,  comme  si  l'Evangile  eust  este  une  doctrine  meschante,  puis  que  le  iuge  du  pays  la  condamnait  :  et  nostre  Seigneur  Iesus  en  sa  personne  eust  este  du  tout  reiette.  Et  cependant  nous  estions  peris,  d'autant  qu'il  n'y  a  eu  autre  moyen  de  nous  reconcilier  a  Dieu,  sinon  par  la  mort  de  son  Fils  unique.  Voyla  donc  l'ouverture  de  vie,  c'est  la  mort  de  nostre  Seigneur  Iesus.  Ainsi  nous  voyons  que  le  diable  s'est  efforce  tant  qu'il  a  peu,  que  nostre  Seigneur  Iesus  ne  mourust  point:  et  toutesfois  qui  est-ce  qui  a  pousse  et  les  Sacrificateurs  et  leurs  semblables  a  poursuyvre  Iesus  Christ  a  mort,  sinon  le  diable?  Il  est  vray:  car  il  besongne  comme  en  forcene:  et  selon  que  nous