46:892  verite  qui  luy  soit  incognue.  Et  quoy?  Et  faut-il  donc  que  nous  soyons  comme  gens  idiots?  Et  n'y  aura-il  que  mensonge  en  nous?  Et  ne  pouvonsnous  discerner  entre  le  bien  et  le  mal?  Et  de  moy  qui  suis  constitue  en  office,  qui  tient  le  lieu  de  l'Empereur,  representant  sa  personne,  et  faudra-il  que  tu  me  reproches  que  ie  n'ay  point  cognu  que  c'est  de  verite?  Voyla  donc  l'intention  de  Pilate:  c'est  qu'il  est  enfle  d'orgueil  comme  un  crapaut,  et  ne  veut  point  estre  en  ceste  reputation,  qu'il  ne  scache  que  c'est  de  bien  et  de  mal.  Et  de  faict  nous  ne  voyons  pas  qu'il  attende  la  response  de  nostre  Seigneur  Iesus:  mais  il  iette  ce  mot  la  comme  par  despit,  et  en  quittant  la  place.  Puis  qu'ainsi  est  donc  avisons  a  nous:  et  si  auiourd'huy  il  y  a  beaucoup  de  Pilates,  qui  refusent  d'estre  enseignez  en  l'eschole  de  Dieu,  et  ee  rendre  dociles,  comme  si  desia  ils  estoyent  assez  scavans,  que  nous  ne  soyons  point  empeschez  de  nous  ranger  en  obeissance  de  foy,  afin  d'accepter  ce  que  nostre  Seigneur  nous  monstre  et  propose:  Voire,  scachans  que  la  verite  ne  croit  pas  en  nos  esprits,  d'autant  qu'il  n'y  a  que  vanite  et  mensonge,  et  que  nous  sommes  plongez  en  tenebres,  iusques  a  ce  que  nostre  Seigneur  nous  en  retire.  Cognoissons  donc  que  la  verite  surmonte  tous  nos  sens  et  facultez,  et  qu'il  faut  bien  que  Dieu  soit  nostre  maistre,  pour  nous  garder  iusques  la:  et  qu'aussi  nous  soyons  petis  pour  recevoir  ce  qu'il  nous  monstre:  Et  que  nous  tenions  ceste  verite  si  precieuse,  que  quand  nous  aurons  circuy  le  ciel  et  la  terre,  qu'il  semblera  que  nous  ayons  tout  apprins,  nous  scachions  que  ce  n'est  que  fumee,  et  que  cela  s'escoulera  iusques  a  ce  que  nous  soyons  fondez  sur  ceste  Parolle,  laquelle  est  certaine  et  immuable:  voyla  donc  en  somme  ce  que  nous  avons  a  retenir.  Or  maintenant  il  est  dit,  comme  Pilate  estoit  assis  en  son  siege,  que  sa  femme  luy  a  mande  qu'il  ne  condamnast  point  Iesus  Christ,  pource  qu'elle  avoit  este  tormentee  de  beaucoup  de  songes.  Il  n'y  a  nulle  doute  que  Dieu  n'ait  voulu  testifier  de  l'innocence  de  Iesus  Christ  en  plusieurs  sortes:  comme  mesmes  par  la  bouche  de  Pilate  (ainsi  que  desia  nous  avons  touche,  et  que  nous  le  verrons  encores  plus  a  plein),  non  pas  que  Dieu  n'eust  desia  conclud  ce  qui  devoit  estre  fait  de  son  Fils  unique.  Ainsi  d'autant  qu'il  vouloit  qu'il  fust  le  Sacrifice  pour  effacer  les  pechez  du  monde,  il  a  falu  que  l'Escriture  fust  accomplie:  mais  tant  y  a  qu'il  faloit  aussi  que  nostre  Seigneur  Iesus  fust  approuve  iuste  et  innocent,  afin  que  nous  cognussions  tant  mieux  qu'il  a  souffert  la  condamnation  qui  nous  estoit  deue,  et  de  laquelle  nous  estions  coulpables:  et  que  nous  regardions  tousiours  a  nos  fautes  et  pechez  en  tout  ce  qui  nous  est  recite  de  la  mort  et  passion  de  nostre  Seigneur  Iesus  Christ.