46:884  tire  des  oblations  du  Temple  l'argent  qu'ils  avoyent  baille  a  Iudas,  il  ne  leur  chaut  de  cela,  ils  n'y  ont  nul  regard  :  et  maintenant  ils  font  scrupule  de  remettre  cest  argent  la  dedans  ce  coffre  des  oblations.  Cependant  ils  repoussentIudas  comme  par  mocquerie,  et  comme  s'ils  disoyent,  Et  bien  ce  meschant-ia  a  trahi  son  maistre,  nous  n'avons  que  faire  s'il  a  bien  ou  mal  fait:  Toutesfois  afin  que  nous  ne  participions  point  a  son  offense  de  nostre  coste,  et  afin  d'avoir  les  mains  lavees  (d'autant  qu'ils  avoyent  employe  cest  argent  a  tel  usage)  nous  en  acheterons  un  champ  pour  la  sepulture  des  estrangers.  Voire,  pour  dire  qu'ils  ont  bien  satisfait  a  Dieu,  et  qu'il  ne  leur  scauroit  plus  que  demander,  encores  qu'il  y  ait  quelque  faute  en  ce  qu'ils  ont  fait.  Et  voyla  comme  les  hypocrites  auront  tousiours  leurs  satisfactions,  et  pensent  bien  se  racheter  par  ce  moyen-la:  mais  ce  ne  sont  que  ieux  de  petis  enfans.  Toutesfois  cognoissons  que  ceci  nous  est  recite,  afin  que  nous  apprenions  quand  nous  aurons  failli,  de  cognoistre  nos  fautes  en  verite  et  ne  point  faire  de  circuits  de  coste  ne  d'autre:  mais  en  tout  et  par  tout  passer  franchement  condamnation.  Voyla  donc  ce  qui  nous  est  monstre.  Et  cependant  prions  Dieu  qu'il  nous  oste  les  bandeaux  dont  Satan  tasche  a  nous  aveugler,  afin  que  nous  ne  croppissions  point  en  nos  flatteries,  voulans  excuser  le  mal:  mais  que  de  plus  en  plus  nous  mettions  peine  a  faire  bon  examen  de  tous  nos  vices  pour  les  condamner,  et  en  faire  une  droite  confession.  Et  au  reste  nous  voyons  aussi  comment  Dieu  renverse  l'opinion  des  hypocrites,  qu'en  la  fin  ils  demeurent  frustrez  de  ce  qu'ils  avoyent  pretendu.  Car  les  Sacrificateurs  eussent  bien  voulu  effacer  leur  faute,  et  que  iamais  on  en  eust  fait  mention  :  et  pretendent  a  cela  quand  ils  achetent  un  champ  pour  la  sepulture  des  estrangers.  Mais  Dieu  tourne  cela  tout  au  rebours  de  leur  intention,  car  il  faut  que  ce  champ-la  s'appelle  champ  de  sang,  champ  de  meurtre:  il  faut  que  ne  memorial-la  soit  perpetuel,  et  que  cela  demeure  a  iamais  en  la  bouche  des  hommes,  des  femmes  et  des  petis  enfans:  tellement  que  ce  crime  detestable  qui  avoit  este  ainsi  commis  par  les  Sacrificateurs  soit  iournellement  cognu  et  manifeste,  et  qu'on  dise,  Voyla  le  champ  de  sang:  c'est  a  dire  le  champ  qui  a  este  achete  d'un  pris  de  trahison.  Et  qui  l'a  fait?  Les  Sacrificateurs  et  les  principaux  de  tout  le  peuple.  Ainsi  donc  nous  voyons  quand  les  hypocrites  tachent  a  se  cacher  en  leurs  forfaits,  et  a  se  desguiser,  qu'alors  Dieu  descouvre  leur  vilenie  tant  plus,  et  fait  que  leur  ignominie  est  cognue  de  tous  hommes,  et  que  chacun  les  ait  en  detestation.  Et  voyla  pourquoy  i'ay  dit  que  tant  plus  nous  faut-il  aviser  de  venir  a  Dieu,  et  la  descouvrir  toutes  nos  offenses,  afin  qu'il  luy  plaise  de  les  ensevelir  et  devant  luy  et  devant