9:88  aequalem  admissus  esset  Christus.  Expedita  erat  sanctis  patribus  ratio,  si  modo  audissent  Christum  [pag.  97]  in  mediatoris  persona  loqui.  Et  verbo  quidem  superiores  erant,  sed  quod  immundo  rostro  perperam  obtrudere  nulla  religio  erat.  Si  nondum  se  agnoscit  Westphalus,  speculum  saltem  habent  lectores,  in  quo  vivam  eius  imaginem  conspiciant.  Caeterum  neque  portenta  excogitamus,  dum  rationem  ostendimus,  qua  se  expediant  piae  mentes:  neque  aliis  imputamus  quae  domi  nostrae  nata  sunt,  dum  pravis  commentis  occurrimus,  quae  sine  iudicio  sorbenda  Westphalus  nobis  propinat.  Multo  minus  ad  prostituendam  religionem  viam  hoc  modo  sternimus,  dum  facimus,  ut  constet  indubia  Christi  verbis  fides,  coeleste  mysterium  reiectis  pravis  deliriis  reluceat,  vigeat  in  nobis  spiritualis  Christi  communicatio,  quae  totam  sacrae  coenae  efficaciam  et  fructum  complectitur.  Nono  capite  pugnaciter  contendit  Westphalus  coenam  me  exinanire,  quia  incredulos  ab  ea  inanes  et  vacuos  dimitto.  Nam  hoc  evidens  argumentum,  non  incertam  coniecturam  esse  iactat:  si  quidem  ex  verbis  meis  colligit  non  nisi  de  virtute  et  effectu  sacramenti  loqui,  quoties  rem  signo  coniunctam  esse  assero.  Confirmandi  etiam  causa  [pag.  98]  adiungit,  me  docere,  quamvis  omnibus  offerat  Dominus  suam  gratiam,  a  solis  fidelibus  recipi.  Neminem  ita  acutum  esse  arbitror,  cui  adhuc  in  mentem  veniat  ingeniosa  Westphali  ratiocinatio.  Et  quis  divinaret  gratiae  nomine  a  me  aboleri  primum  omnis  gratiae  caput  et  fontem?  Ego  enim,  ubi  de  gratuitis  Dei  beneficiis  agitur,  semper  soleo  a  Christo  incipere:  et  merito,  quia  donec  noster  fiat,  gratiis  omnibus  privari  nos  ac  destitui  necesse  est,  quarum  in  se  plenitudinem  continet.  Quam  non  cupiam  sophistice  elabi,  ex  loco  fiat  iudicium.  Generaliter  illic  dixi,  quaecunque  gratuita  dona  nobis  offert  Deus  in  aeternam  salutem,  non  nisi  fide  recipi.  Unde  conficitur,  solos  fideles  Christi  et  spiritualium  eius  bonorum  esse  participes.  Westphalus  pro  evidenti  argumento  affert  quod  nemo  ex  verbis  meis  vel  suspicari  poterat.  Tam  scite  exorsus  calumniose  doctrinam  meam  pervertit,  si  impius  ad  mensam  accedat,  iam  amplius  virtutem  non  esse  coniunctam  signis:  quod  nusquam  apud  me  reperietur.  Nam  quod  sciscitatur,  ubi  iam  manebit  verbum  Domini,  sacramentum  idem  constituens  omnibus  sive  bonis  sive  malis,  in  eadem  certe  [pag.  99]  illa  pagina  oculatis  videndum,  imo  caecis  palpandum  exposui.  Iam  in  Consensu  diserta  exceptio  posita  fuerat,  hominum  incredulitate  non  labefactari  Dei  fidem,  quin  semper  vim  suam  retineant  sacramenta,  ideoque  ex  Dei  parte  nihil  mutari:  sed  quantum  ad  homines  spectat,  unumquemque  pro  fidei  suae  mensura  accipere.  Ego  vero  quam  sollicite  caveam,  ne  Dei  veritas  ab  hominibus  pendere  credatur,  ex  lectione