52:88  20.  Et  per  ipsum  reconciliare  omnia  sibi.  Hoc  quoque  magnificum  est  Christi  elogium,  quod  non  aliter  quam  per  ipsum  coniuncti  esse  Deo  possumus.  Primum  reputemus,  in  hoc  sitam  nobis  esse  felicitatem,  ut  Deo  adhaereamus:  rursus  nihil  esse  miserius  quam  ab  eo  esse  alienatos.  Pronuntiat  igitur  nos  per  solum  Christum  beatos  esse,  quia  ipse  vinculum  sit  nostrae  cum  Deo  coniunctionis:  rursus  extra  ipsum  esse  miserrimos  qui  a  Deo  simus  exclusi.  Quod  autem  Christo  tribuit,  meminerimus  esse  eius  proprium  :  ut  in  nullum  alium  huius  laudis  portio  transscribatur.  Quare  subaudiendae  sunt  antitheses:  si  haec  Christi  praerogativa  est,  minime  in  alios  competere.  Nam  ex  professo  disputat  contra  eos  qui  angelos  pacificatores  fingebant,  per  quos  aditus  patefieret  ad  Deum.  Pacificando  per  sanguinem  crucis  eius.  De  patre  loquitur,  quod  propitiatio  fuerit  suis  creaturis  per  Christi  sanguinem.  Vocat  autem  sanguinem  crucis:  quia  ideo  pignus  et  pretium  nostrae  cum  Deo  pacificationis  fuit  sanguis  Christi,  quia  in  cruce  fusus.  Victimam  enim  expiatricem  fieri  oportuit  Dei  filium,  et  peccati  reatum  sustinere,  ut  essemus  iustitia  Dei  in  illo.  Sanguis  ergo  crucis  sanguinem  sacrificii  significat,  quod  immolatum  in  cruce  fuit  ad  placandum  iram  Dei.  Addendo,  per  ipsum,  nihil  novum  dicere,  sed  quod  iam  dixerat,  certius  exprimere,  et  altius  etiamnum  animis  nostris  infigere  voluit:  nempe  sic  Christum  unum  reconciliationis  esse  autorem,  ut  alia  quaevis  media  excludat.  Nemo  enim  alius  pro  nobis  crucifixus.  Ergo  ipse  solus  est  per  quem  et  cuius  gratia  Deum  habemus  propitium.  Tam  super  terram,  quam  in  coelis.  Si  rationales  tantum  creaturas  intelligere  libeat,  erunt  homines  et  angeli.  Quamquam  nihil  absurdi  erit,  ad  omnes  sine  acceptione  extendere.  Verum  ne  subtilius  philosophari  necesse  sit,  placet  de  angelis  et  hominibus  esse  dictum:  ac  de  his  quidem  nulla  difficultas  quin  pacificatore  apud  Deum  indigeant.  De  angelis  autem  quaestio  non  facilis  ad  explicandum.  Quorsum  enim  reconciliatio,  ubi  nullum  fuit  dissidium  aut  simultas?  Multi  hac  ratione  permoti,  ita  exposuerunt  praesentem  locum,  angelos  in  concordiam  reductos  esse  cum  hominibus:  atque  ita  coelestes  cum  terrenis  rediisse  in  gratiam.  Sed  aliud  sonant  verba  Pauli,  Deum  sibi  r  e  c  o  n  c  i  l  i  a  s  s  e  :  coacta  igitur  est  illa  solutio.  Restat  ut  videamus  qualis  sit  angelorum  et  hominum  reconciliatio.  Dico  homines  Deo  reconciliatos  esse,  quod  ante  ab  eo  essent  alienati  per  peccatum:  quod  iudicem  sensuri  erant  in  suum  exitium,  nisi  intervenisset  gratia  mediatoris  ad  iram  eius  placandam.  Genus  ergo  pacificationis  inter  Deum  et  homines  fuit,  quod  per  Christum  abolitae  fuerunt  inimicitiae:  itaque  Deus  ex  iudice  factus  est  pater.  Inter  Deum  et  angelos  longe  diversa  ratio.  Illic  enim  nulla  de-