44:88  gratiae  Dei  ipsorum  peccatis.  Ergo  nisi  bis  fuissent  caeci,  haec  experientia  debebat  eos  expergefacere,  quemadmodum  etiam  vidimus  apud  Ioelem  cap.  1.  Dicit  in  fine  versus,  qui  mercedem  contrahit,  contrahit  eam  in  sacculum  perforatum:  quibus  verbis  admonet  non  tantum  posse  conspici  Dei  vindictam  in  sterilitate  terrae,  et  in  ipsa  esurie  hominum  qui  comedendo  non  saturantur:  sed  in  ipsorum  operis,  ubi  scilicet  multum  se  fatigant,  et  sine  profectu:  quia  pecunia  etiam  ubi  in  crumenam  coniecta  est,  evanescat.  Ergo  operae  etiam  vestrae  sunt  inanes,  inquit.  Est  autem  hoc  satis  manifestum  irae  Dei  signum,  ubi  pecunia  etiamsi  recondita  fuerit,  tamen  diffluit.  Iam  videmus  quid  sibi  velit  propheta:  quia  frigebat  doctrina  apud  Iudaeos,  et  admonitiones  spernebant,  tractat  eos  pro  ingenii  pervicacia.  Ostendit  igitur  etiamsi  contemnant  Deum  et  eius  prophetas,  ipsos  tamen  poenis  satis  doceri:  et  tamen  adhuc  manere  stupidos.  Ergo  exstimulat  quemadmodum  asinos,  ut  tandem  agnoscant  Deum  non  immerito  sibi  irasci  :  iam  vero  eius  conspicuam  esse  tam  in  sterilitate  terrae,  quam  in  tota  ipsorum  vita:  quia  sive  comedant,  sive  abstineant  a  cibo,  sunt  tamen  famelici:  deinde  si  strenue  laborent,  et  si  colligant  mercedem,  ipsam  tamen  diffluere,  ac  si  congesta  esset  in  crumenam  perforatam.  Sequitur:  7.  Sic  dicit  Iehova  exercituum,  Ponite  cor  vestrum  super  vias  vestras.  8.  Adscendite  in  montem,  et  afferte  lignum,  et  aedificate  domum  (vel  hanc  domum)  et  propitius  ero  in  ea  (vel  mihi  placebit  in  ea)  et  glorificabor,  dicit  Iehova.  Nunc  addit  propheta,  Ubi  edocti  malis  fuerint  Iudaei,  iam  nihil  aliud  restare,  nisi  ut  se  accingant  celeriter  ad  aedificandum  templum:  quia  non  est  cunctandi  tempus  ubi  intelligunt  Deum  manu  armata  prodire  ad  ius  suum  exigendum.  Sterilitas  enim  de  qua  loquutus  est  et  inopia,  deinde  alia  signa  maledictionis,  erant  quasi  exsertus  gladius  in  manu  Dei:  quo  palam  erat  ipsum  velle  ulcisci  negligentiam  populi.  Quum  ergo  ita  fraudatus  esset  Deus  suo  iure,  non  modo  populum  hortatus  est  per  suos  prophetas,  sed  vindictam  etiam  exercuit  contra  illum  contemptum.  Haec  ratio  est  cur  propheta  nunc  dicat,  Adiicite  cor  vestrum:  et  tunc  conscendite  in  montem,  afferte  lignum.  Hic  autem  locus  optime  exprimit  cur  Deus  poenas  exigat  de  hominum  peccatis:  non  tantum  scilicet  ut  sentiant  se  peccasse,  sed  ut  studeant  corrigere  quidquid  Deo  displicet.  Secundo  hinc  etiam  colligimus  quomodo  ad  poenitentiam  progredi  nos  oporteat.  Initium  est,  ut  peccata  nostra  displiceant  nobis:  sed  si  quis  non  ultra  promoveat,  erit  duntaxat  motus  aliquis  evanidus.  Necesse  igitur  est  ad  secundum  gradum  progredi,  nempe  ut  sequatur  correctio  in  melius.