46:878  profit  de  ceste  doctrine.  Or  nous  n'oyons  point  ces  choses  afin  d'estre  iuge  de  Pierre,  et  condamner  sa  laschete.  Il  est  vray  que  nous  le  pouvons  faire  iustement,  mais  cependant  si  faut-il  en  premier  lieu  recevoir  instruction,  que  cognoissans  nostre  foiblesse,  cognoissans  mesmes  que  nous  ne  pouvons  du  tout  rien,  nous  ne  soyons  point  enflez  d'orgueil,  nous  attribuant  par  folle  opinion  quelque  vertu.  Et  cependant  que  nous  cognoissions  aussi,  d'autant  que  le  Diable  ha  tant  de  moyens  pour  machiner  nostre  ruine,  qu'il  viendroit  bientost  a  bout  de  nous,  veu  que  S.  Pierre  est  trebuscho  sans  qu'il  y  eust  nulle  apparence.  Et  puis  cognoissons  finalement  que  nostre  Seigneur  Iesus  a  pitie  de  nous  quand  il  ne  permet  point  que  nous  soyons  tentez  outre  mesure.  Car  il  est  certain  que  tousiours  le  mal  se  descouvriroit  tant  plus,  et  qu'on  cognoissoit  qu'apres  avoir  commis  une  faute,  nous  serions  prests  a  redoubler,  et  qu'il  n'y  auroit  nulle  fin,  sinon  que  nous  fussions  retenus  par  sa  bonte.  Voyla  toutes  les  choses  que  nous  avons  yci  a  observer.  Or  cependant,  il  est  dit  que  Pierre1  apres  avoir  ouy  chante  le  coq  et  (comme  S.  Luc  recite)  apres  que  Iesus  Christ  l'a  regarde,  est  sorti  dehors,  et  a  plore  amerement.  En  ceste  conclusion  il  nous  est  monstre  (comme  i'ay  desia  touche)  que  la  mort  et  passion  de  nostre  Seigneur  Iesus  a  desia  produit  son  effet  et  sa  vertu  entant  que  Pierre  a  este  releve  d'une  telle  cheute  et  si  horrible.  Car  n'est-ce  pas  un  miracle,  que  Dieu  ait  eu  pitie  de  luy,  et  qu'il  ait  encores  obtenu  merci  apres  avoir  commis  une  faute  tant  detestable?  Nous  avons  declare  qu'il  ne  pouvoit  avoir  excuse  d'ignorance,  comme  si  sa  faute  estoit  petite  d'avoir  renonce  Iesus  Christ:  car  il  luy  avoit  este  dit  et  prononce  que  s'il  ne  rendoit  confession  de  sa  foy  devant  les  hommes,  et  tesmoignage,  il  meritoit  d'estre  racle  du  tout  devant  les  Anges  de  Dieu,  et  que  son  nom  fust  efface  du  livre  de  vie:  et  toutesfois  il  ne  luy  chaut  de  racheter  ceste  miserable  vie  et  caduque  par  un  renoncement  si  vilein  et  si  estrange:  Voire  combien  qu'il  ne  soit  point  encores  mene  devant  les  iuges.  Il  n'est  point  interrogue  iusques  au  bout,  il  y  a  une  chambriere  qui  parle  a  luy:  et  quand  encores  on  eust  voulu  user  de  rudesse  envers  luy,  et  bien,  il  n'y  avoit  autre  chose  sinon  qu'on  l'eust  batu  comme  un  povre  malotru,  on  l'eust  dechasse.  Et  neantmoins  il  ne  laisse  pas  d'oublier  toute  crainte  de  Dieu.  Quand  donc  nous  voyons  cela,  pensons  tant  mieux  a  nous,  qu'il  falloit  bien  que  Dieu  desployast  les  thresors  infinis  de  sa  bonte,  quand  il  a  fait  Pierre  encores  participant  du  fruit  de  la  mort  et  passion  de  son  Fils.  Voyla  donc  un  miracle  qui  nous  doit  tous  ravir,  que  Pierre  ait  obtenu  remission  d'une  telle  offense,  et  si  lourde:  voire  comme  il  appert  par  sa