44:87  87  IN  HAGGAEUM  88  poenas  in  medium,  quibus  iam  castigati  fuerant.  Yulgo  dicitur,  experientiam  esse  magistram  stultorum  :  et  propheta  huc  tendit  in  his  verbis,  Adiicite,  inquit,  corda  vestra  ad  vias  vestras,  hoc  est,  si  nullius  apud  vos  momenti  est  aut  Dei  autoritas,  aut  ratio,  saltem  reputate  quomodo  vos  Deus  tractet.  Unde  fit  ut  esuriatis?  ut  et  coelum  et  terra  vobis  victum  denegent?  deinde  etiamsi  multum  absumitis  ciborum,  tamen  nulla  sit  satietas?  Denique  ut  omnia  in  manibus  vestris  diffluant  et  evanescant?  Unde  hoc?  non  potestis  aliud  statuere,  quam  Deum  vobis  esse  infestum.  Ergo  si  non  obtemperatis  sponte  verbo  Dei,  saltem  poenae  ipsae  vos  adducant  ad  aliquam  resipiscentiam.  Hoc  enim  est  cor  adiicere  super  vias  suas,  si  agnoscant  non  fortuito  se  ita  esse  famelicos  sed  quia  ipsos  urget,  vel  ipsorum  capitibus  incumbit  maledictio  Dei.  Iubet  ergo  ipsos  capere  consilium  ex  rebus  ipsis  vel  experimentis.  Et  his  verbis  acrius  pungit  eos  propheta:  quasi  diceret  se  nihil  proficere  docendo  vel  monendo  :  hoc  restare  ultimum,  ut  saltem  violenter  trahantur  ubi  Dominus  ipsos  castigat.  Dicit  eos  multum  seminasse  et  exiguum  fuisse  proventum.  Qui  sententiam  hanc  accipiunt  in  futuro  tempore,  corrumpunt  prophetae  sensum.  Quorsum  enim  dixisset,  Adiicite  cor  vestrum  ad  vias  vestras,  si  tantum  denuntiaret  poenas  in  futurum  tempus?  sed  quemadmodum  iam  dixi  ostendit  eos  nimis  inconsiderate  arrodere  fraenum,  quia  non  sentiunt  mala  omnia  sibi  infligi  Dei  manu:  et  non  simul  reputant  iustum  esse  eius  iudicium.  Ergo  dicit  eos  multum  seminasse  et  fuisse  exiguam  messem:  deinde  ipsos  comedere  et  non  satiari,  bibere  et  non  inebriari,  vestiri  neque  tamen  calefieri.  Utcunque  ad  manum  habeant  quae  videntur  requiri  subsidia  ad  usum  vitae:  tamen  nihil  ipsis  prodesse.  Scimus  autem  Deum  utroque  modo  poenam  sumere  de  hominibus:  vel  ubi  subducit  suam  benedictionem,  dum  arida  est  terra  et  coelum  siccum,  vel  dum  in  ipsa  frugum  copia  tamen  nulla  est  satietas,  imo  nullus  usus.  Saepe  continget,  homines  colligere  quantum  sufficeret  ad  victum  :  interea  tamen  semper  esurire.  Haec  species  maledictionis  clarius  apparet  quum  Deus  aufert  virtutem  suam  a  pane  et  vino,  ut  vires  non  suppeditent  cibos  et  potus.  Ubi  ergo  nihil  conferunt  fruges  ipsae,  et  quidquid  terra  profert  in  alimenta  hominum,  Deus  quasi  aperto  brachio  ostendit  se  esse  ultorem.  Altera  autem  maledictio  frequentior  est,  ubi  scilicet  Deus  terram  ariditate  percutit,  ut  nihil  proferat:  utramque  vero  speciem  attingit  propheta  noster:  Ecce  inquit  seminastis  multum  et  parum  colligetis:  deinde,  etiamsi  suppetat  proventus  et  vini  et  tritici,  comedendo  et  bibendo  non  potestis  tamen  vos  saturare:  imo  vestes  ipsae  vos  non  calefaciunt.  Iam  debuerant  certo  sperare  uberrimam  frugum  copiam  quum  reversi  essent,  nisi  abruptus  fuisset  cursus