9:865  865  PRAEFATIONES.  866  prouver  que  c'est,  i'ay  bien  voulu  testifier  en  partie  ce  qui  en  est,  pour  donner  courage  a  ceux  qui  s'en  voudront  fier  en  moy,  et  les  inciter  a  voir,  iusqu'a  ce  qu'ilz  en  puissent  iuger  d'euxmesmes.  Non  pas  que  ie  presume  tant  que  de  m'attribuer  le  iugement  dessus  les  oeuvres  des  autres,  pour  en  prononcer  comme  par  authorite:  ou  de  ranger  a  mon  opinion  et  advis  tous  les  lecteurs.  Toutefois  pource  que  ie  pense  et  suis  tout  persuade  que  plusieurs  ne  refuseront  point  d'acquiescer  a  ce  que  ie  leur  en  affermer  ay,  ie  me  suis  ingere  pour  le  profit  d'iceux  d'en  dire  mon  semblant.  Combien  qu'il  n'est  ia  mestier  de  desduire  au  long  tout  le  profit  qui  s'en  pourra  recueillir  et  le  plaisir  que  on  y  prendra.  Seulement  ie  puis  certifier  que  tous  ceux  qui  auront  la  patience  de  continuer  la  lecture,  ne  se  repentiront  point  de  s'estre  si  bien  adresses.  Il  y  a  un  poinct  seul,  que  ie  sache,  qui  pourroit  diminuer  la  grace  du  livre  envers  aucuns.  C'est  qu'il  semble  bien  advis  que  les  matieres  de  la  Chrestiente  se  doyvent  traicter  avec  une  gravite  correspondente  a  leur  dignite  et  hautesse:  et  pourtant  qu'il  n'est  pas  convenable  de  les  mesler  avec  propoz  ioyeux,  attendu  mesme  qu'il  y  a  dangier  qu'en  ce  faisant  on  ne  les  tourne  en  risee.  Principalement  au  temps  present,  auquel  l'impiete  s'est  desbordee  plus  que  depuis  le  commencement  de  l'Eglise  Chrestienne:  ou,  pour  le  moins,  elle  s'est  plus  clairement  descouverte.  Afin  que  nul,  pour  estre  preoccupe  de  ceste  raison,  ne  soit  desgouste  de  la  lecture,  il  est  a  noter  qu'on  dispute  des  matieres  de  la  Chrestiente  en  deux  sortes:  premierement,  en  taxant  les  folles  superstitions  qui  sont  survenues  entre  les  Chrestiens  soubz  umbre  de  la  religion,  lesquelles  toutesfoys  ne  sont  que  corruptions  d'icelle,  pour  la  renverser  et  destruire.  Secondement,  en  monstrant  la  simple  et  pure  verite,  selon  qu'elle  nous  est  revelee  de  Dieu  par  sa  saincte  parolle.  Quant  a  ceste  seconde  espece,  il  est  certain  qu'incontinent  que  nous  avons  ouvert  la  bouche