9:862  sparserat,  non  fuisse  ullo  modo  dicendum  melius,  quod  idem  esset.  Id  inter  multos  vagatum  fuerat  antequam  nobis  innotesceret.  Promptum  scilicet  fuit  producto  apostoli  testimonio  hominem  pudefacere.  Ergo  levitatis  convictus  veniam  a  me  petiit  et  simul  impetravit.  Quin  etiam  deprecator  fui  apud  senatum  ne  quid  severius  de  ipso  statueretur.  Ab  eo  tempore  non  aliter  domum  meam  frequentavit  quam  solebat.  Ex  Gallia,  ubi  mortuus  est,  quoties  ad  me  scripsit,  erat  obsequentissimus  filius,  ego  reverendus  pater.  Hoc  certe  nitatur  teste  Balduini  impudentia,  ego  autem  laborem?  Multo  vero  minus  in  frivolis  quas  efflat  iactantiis  me  movet  eius  stoliditas.  Porro,  tametsi  quiescendum  mihi  duxi,  consilium  optimi  et  integerrimi  fratris  mei  Bezae  adeo  non  reprehendo,  ut  me  non  parum  oblectaverit  concinna  et  simul  omni  fuco  pura  eius  responsio.  Utinam  celerius  inchoasset:  quia  incredibilis  festinatio,  ut  totam  causam  pro  suo  arbitrio  perageret,  non  tulit.  Satis  tamen  erit,  veritatem  in  hac  sincera  ingenuaque  defensione  ita  splendere,  ut  victrix  supra  omnes  Balduini  nebulas  emineat.