23:86  sus  sepeliunt  Dei  gratiam  quam  spiritus  praecipue  commendat.  Frigide  etiam  alii,  qui  tantum  propter  regenerationis  donum  fide  nos  purgari  docent,  ut  accepti  simus  Deo.  Neque  enim  dimidiam  modo  partem  omittunt,  sed  aedificant  absque  fundamento,  quando  propter  generis  humani  maledictionem  gratuita  reconciliatio  praecedat  necesse  est.  Deinde  quando  nunquam  ita  suos  regenerat  Deus  in  hoc  mundo,  ut  perfecte  ipsum  colant,  nullum  hominis  opus  sine  expiatione  gratum  esse  potest.  Atque  huc  spectavit  legalis  lavandi  caeremonia,  ut  discerent  homines,  quoties  vellent  ad  Deum  accedere,  aliunde  petendam  esse  munditiem.  Ergo  tunc  demum  ad  nostra  obsequia  respiciet  Deus,  ubi  nos  in  Christo  respexerit.  5.  Ad  Cain  vero  et  ad  oblationem  eius  non  respexit.  Non  dubium  est  quin  se  gesserit  Cain  ut  solent  hypocritae:  nempe  Deum  placare  defunctorie  voluit  externis  sacrificiis,  se  autem  totum  illi  dicare  minime  curavit.  Atqui  legitimus  hic  cultus  est,  offerre  nos  Deo  spirituales  victimas.  Talem  hypocrisin  quum  Deus  videat  cum  crasso  et  manifesto  sui  ludibrio  coniunctam  esse,  non  mirum  est  si  oderit,  ac  tolerare  nequeat:  unde  etiam  fit  ut  respuat  eorum  opera  qui  se  ipsos  illi  subtrahunt.  Nos  enim  vult  primum  sibi  habere  addictos:  deinde  in  eius  obedientiae  testimonium  opera  nostra  quaerit,  sed  nonnisi  secundo  loco.  Notandum  autem,  figmenta  omnia,  quibus  et  Deo  et  sibi  ipsis  homines  illudunt,  infidelitatis  esse  fructus.  Accedit  et  superbia,  quod  increduli  contempta  mediatoris  gratia  secure  in  Dei  conspectum  se  ingerunt.  Stulte  comminiscuntur  Iudaei,  ingratas  fuisse  oblationes  Cain,  quia  Deum  opimis  spicis  defraudans,  steriles  solum  vel  semiplenas  maligne  offerret.  Altius  et  magis  reconditum  fuit  malum,  illa  scilicet,  quam  dixi,  cordis  immundities:  sicuti  e  converso  sacrificiis  Abel  gratiam  conciliare  non  potuit  foetidus  ex  combustione  adipis  nidor,  sed  bono  fidei  odore  perfusa  suaviter  olebant.  Et  iratus  est  Cain  vehementer.  Quaeritur  hoc  loco  unde  intellexerit  Cain,  fratris  oblationibus  suas  fuisse  posthabitas.  Hebraei  suo  more  ad  divinationem  confugiunt,  et  fingunt  sacrificium  Abel  igne  coelesti  fuisse  consumptum:  sed  quia  tantum  licentiae  nobis  permittere  non  debemus  ut  miracula  comminiscamur  quae  nullum  habent  ex  scripturis  testimonium,  facessant  Iudaicae  fabulae.  Ac  magis  quidem  probabile  est,  ex  continuo  rerum  successu  Cain  iudicium  iecisse,  cuius  meminit  Moses.  Vidit  fratri  melius  esse  quam  sibi:  inde  collegit  Deum  illi  esse  propitium,  sibi  infensum.  Scimus  autem  hypocritis  nihil  pluris  esse  benedictione  terrena,  nihilque  magis  esse  cordi.  Porro  nobis  in  persona  Cain  pingitur  imago  impii  hominis,  qui  tamen  iustus  vult  haberi,  imo  sibi  inter  sanctos  locum  pri-  6*