9:850  il  est,  craignant  d'esmouvoir  contention,  il  s'est  accommode  a  l'usage  commun.  Non  pas  toutesfoys  que  son  intention  soyt  de  mettre  l'absolution  en  un  mesme  rang  avec  la  Cene  et  le  Baptesme,  luy  attribuer  une  pareille  vertu,  imposer  telle  necessite  aux  Chrestiens  de  l'observer,  comme  si  c'estoyt  un  sacrement  estably  par  Iesus  Christ:  mais  plustost  il  y  a  voulu  user  d'une  permission  ou  souffrance,  que  de  l'affermer.  Ce  qu'on  peut  appercevoir  par  la  raison  que  il  allegue.  C'est  d'autant  qu'il  la  tient  pour  une  police  bonne  et  utile.  Voyre,  mais  cela  ne  suffit  pas  en  la  rigueur,  qu'on  en  doyve  pourtant  faire  un  sacrement.  Quant  les  lecteurs  garderont  une  telle  modestie  a  iuger  du  livre  qu'a  eu  l'auteur  en  le  composant,  tout  ira  bien,  et  n'y  aura  rien  qui  les  empesche  a  y  profiter  beaucoup.  Mais  le  mal  est  que  la  pluspart  auiourdhuy,  en  lisant  un  livre  quel  qu'il  soyt,  n'y  cherchent  pas  tant  instruction  que  d'y  trouver  a  mordre.  Que  s'ilz  y  trouvent  un  mot  seulement  couche  de  travers,  pour  le  premier  ce  leur  est  un  hocquet  qui  les  empesche  de  n'en  recueillir  aucun  fruict.  Apres,  oubliant  tout  le  bien  qui  y  est,  ilz  triumphent  en  ce  qui  leur  est  occasion  de  ruine.  Qui  pis  est,  les  plus  ignorans  y  sont  les  plus  audacieux.  Les  autres  sont  tant  delicats  qu'il  ne  faut  si  peu  que  rien  pour  leur  faire  perdre  tout  goust.  Tellement  que  pour  une  sentence,  qui  ne  sera  pas  a  leur  plaisir,  ilz  reietteront  un  livre  entier,  ou  il  y  en  aura  mille  de  bien  bonnes  et  auxquelles  il  leur  seroyt  bien  expedient  de  s'arrester.  Il  n'y  a  doubte  que  ce  ne  soyt  un  artifice  du  diable  pour  les  desbaucher  qu'ilz  ne  recoyvent  la  bonne  doctrine  qui  leur  est  presentee.  Parquoy  que  celluy  qui  voudra  estre  enseigne  au  present  livre  se  rende  docile,  excusant  ce  qui  le  pourroyt  achopper  a  passer  tousiours  plus  outre,  pour  estre  conduict  droyt  a  la  pure  verite  de  Dieu,  a  laquelle  seule  il  nous  convient  tenir,  nous  servant  des  hommes  pour  nous  ayder  a  y  parvenir.  Calvini  opera.  Vol.  IX.  54