9:85  85  CONTRA  WESTPHALUM.  86  gitima  excusus  nobis  displicet,  an  ideo  expressis  Christi  verbis  non  subscribimus?  Corpus  suum  se  dare  promittit  filius  Dei:  verbum  eius  apud  nos  sine  controversia  plenam  fidem  obtinet.  Ac  quanquam  reclamat  carnis  sensus,  et  natura  tam  sublime  arcanum  angelis  etiam  admirabile  non  admittit,  certo  tamen  credimus  intus  coelesti  virtute  impleri,  quod  nobis  visibile  symbolum  figurat.  Quum  inter  magistrum  1)  et  nos  optime  conveniat,  Westphalus  se  medium  ingerens,  turbas  miscet,  ac  si  sacram  coenam  aboleremus,  quia  panem  non  fatemur  substantialiter  [pag.  90]  corpus  esse,  nos  praeter  panem  nihil  dare,  nihil  accipere  pronunciat.  Quid?  si  infidelibus  Christi  corpus  concedit,  unde  nova  ista  austeritas?  Christum  mendacii  argui  contendit,  si  non  peraeque  eius  carne  et  sauguine  potitus  sit  Iudas  ac  Petrus.  Fingamus  pro  fidei  nostrae  modulo  nondum  nos  apprehendisse  miraculum,  quod  iactant  isti  doctores  :  quodnam  est  tantum  nostrum  scelus,  ut  longius  quam  Iudam  nos  extrudant?  Hanc  scilicet  reverentiam  deferunt  Christo,  ne  cuius  apud  eos  momenti  sacra  eius  institutio  sit,  nisi  eorum  placitp  innixa.  Si  quis  foetidus  scortator,  si  periurus,  si  veneficus,  si  latro,  si  quo  etiam  turpiore  flagitio  opertus,  si  semipaganus  quispiam  ad  sacram  coenam  accedat,  si  illuc  afferat  vel  sceleris  vel  superstitionum  inquinamenta,  sanctum  Christi  corpus  ei  prostituunt.  Nobis  quia  de  recipiendi  modo  non  consentimus,  nihil  relinquunt  praeter  panem  et  vinum.  Detonat  etiam  pleno  gutture  Westphalus,  sine  fructu  nos  de  spirituali  manducatione  concionari:  ac  si  pluris  sit  articulus  unus  de  carnis  praesentia,  quam  plena  et  solida  fides.  De  Christi  natura,  virtute,  ac  beneficiis  omnibus  [pag.  91]  de  utraque  Christi  natura,  de  eius  functione  et  officio,  de  efficacia  et  fructu  tam  mortis  eius  quam  resurrectionis,  de  spirituali  eius  regno,  orthodoxam  esse  meam  fidem  fateri  cogitur.  Finem  etiam  et  usum  coenae  recte  a  me  exponi  non  negat.  Hoc  totum  ut  ne  pili  quidem  aestimet,  scrupulus  unus  facit,  quia  carnis  substantiam  ore  vorari  non  credimus.  Atqui  quum  haec  duo,  inquit,  coniunctim  dicta  sunt:  Facite  in  meam  commemorationem;  item:  Hoc  est  corpus  meum  :  utrumque  simul  credi  necesse  est,  quia  frustra  alterum  credemus  in  altero  increduli.  Quorsum  verbosa  ista  denunciatio,  quum  in  disceptationem  minime  veniat  Christi  autoritas,  sed  verborum  duntaxat  sensus?  Res  esse  individuas  promissionem  et  mandatum  pridem  satis  copiose  docui.  Quare  donec  extorqueat  hic  clamator  formam  loquendi  in  Christi  verbis  non  esse  sacramentalem,  nec  quidquam  habere  cum  aliis  omnibus  scripturae  locis  consentaneum,  ubi  de  sacramentis  agitur,  nos  vocando  incredulos  insanum  et  vecordem  se  esse  prodet.  1)  le  Maistre  celeste.