51:85  85  SUR  L'EPITRE  AUX  GALATES.  QUARANTIEME  SERMON.  GALATES.  Chap.  VI,  v.  6.8.  Nous  voyons  assez  que  sainct  Paul  ne  pouvoit  estre  suspect  partout  ou  il  estoit  cognu  d'estre  par  trop  addonne  a  son  profit:  car  combien  qu'il  luy  fust  licite  d'estre  nourri,  d'autant  qu'il  portoit  la  parole  de  Dieu,  si  est-ce  qu'il  s'est  abstenu  de  ceste  liberte  (comme  nous  voyons)  a  fin  d'aller  au  devant  de  tous  scandales:  et  il  proteste  que  iour  et  nuict  il  a  este  contraint  pour  gagner  sa  vie  de  labourer  de  ses  propres  mains:  mais  d'autant  plus  a-il  peu  sans  aucune  suspicion  exhorter  ceux  qui  estoyent  nonchalans  a  faire  leur  devoir,  comme  nous  le  voyons  en  ce  passage.  Il  commande  que  celuy  qui  enseigne  soit  nourri,  et  qu'on  ne  souffre  point  que  rien  luy  defaille.  Or  si  sainct  Paul  eust  este  (comme  desia  nous  avons  dit)  un  homme  plein  d'avarice,  pour  attirer  a  soy  le  bien  d'autruy,  ou  bien  qu'il  eust  este  plein  de  convoitise  pour  se  faire  valoir  en  pompes  et  en  bombances,  il  eust  eu  la  bouche  close,  et  tousiours  on  eust  replique  qu'il  parloit  pour  soy,  et  que  cela  n'estoit  point  s'addonner  au  service  de  Dieu:  mais  pour  ce  qu'il  avoit  assez  declare  par  experience  qu'il  ne  cerchoit  sinon  en  s'oubliant  et  n'ayant  nul  esgard  a  sa  personne,  d'avancer  le  regne  de  nostre  Seigneur  Iesus  Christ  et  edifier  l'Eglise,  voila  comme  il  a  peu  redarguer  l'ingratitude  de  ceux  qui  s'acquittoyent  mal  envers  leurs  pasteurs,  d'autant  qu'ils  leur  espargnoyent  la  nourriture  du  corps,  ayans  la  viande  et  pasture  des  ames  par  leur  moyen.  Or  cela  est  trop  inhumain,  quand  un  homme  ne  cognoist  point  que  celuy  qui  luy  apporte  la  doctrine  de  salut  est  comme  un  pere  nourricier  qui  luy  est  envoye  de  Dieu,  et  que  pour  le  moins  ii  ne  tasche  a  luy  distribuer  la  vie  corporelle.  Quand  donc  les  hommes  sont  ainsi  nonchalans  en  cest  endroit,  ils  monstrent  un  mespris  de  la  parole  de  Dieu:  car  nature  nous  doit  enseigner,  quand  nous  sommes  redevables  a  quelqu'un,  de  nous  efforcer  tant  qu'il  nous  sera  possible  de  luy  rendre  la  pareille.  Et  si  nous  ne  pouvons,  monstrer  pour  le  moins  que  ce  n'est  point  par  faute  de  bon  vouloir.  Or  ici  on  ne  peut  pas  rendre  la  pareille:  car  la  parole  de  Dieu  ne  trouvera  rien  en  ce  monde  qui  puisse  estre  mis  en  balance  a  l'opposite.  Tant  y  a  que  ceux  qui  sont  enseignez,  doivent  pour  le  moins  ne  point  espargner  leurs  biens  temporels,  qu'ils  ne  nourrissent  ceux  desquels  ils  recoivent  ce  thresor  inestimable  de  l'Evangile:  et  mesmes  nous  voyons  que  c'a  este  l'astuce  de  Satan  de  vouloir  despouiller  l'Eglise  de  Dieu  de  bons  pasteurs  et  ministres,  quand  on  les  a  comme