46:848  eust  besongne  en  luy.  Et  ne  faut  pas  estimer  que  c'ait  este  langage  superflu,  quand  il  a  reitere  ces  mesmes  propos.  Car  ce  qui  est  dit  en  l'autre  passage,  qu'en  priant  Dieu  il  ne  nous  faut  point  estre  de  long  babil,  comme  ceux  qui  cuident  en  barbotant  obtenir  beaucoup  plus,  n'emporte  pas  que  nous  ne  continuyons  en  nos  prieres:  Mais  c'est  pour  taxer  l'hypocrisie  et  la  superstition  de  ceux  qui  cuident  en  rompant  les  aureilles  a  Dieu  (par  maniere  de  dire)  luy  faire  acroire,  et  le  persuader  de  ce  qu'ils  voudront:  comme  nous  voyons  que  ceste  folie  a  regne  au  monde.  Et  encores  entre  nous  combien  y  en  a-il  qui  usent  de  ceste  sorcellerie,  combien  qu'ils  ne  disent  plus  leur  Ave  maria,  toutesfois  qu'en  disant  leur  Pater  noster,  il  leur  semble  que  ils  ayent  beaucoup  gaigne,  et  que  Dieu  contera  toutes  leurs  paroles,  qu'ils  auront  ainsi  barbotees  en  priant?  Or  i'appelle  cela  une  vraye  sorcellerie:  car  ils  profanent  vilainement  l'oraison  qui  nous  a  este  donnee  de  nostre  Seigneur  Iesus  Christ,  en  laquelle  il  nous  a  compris  en  un  brief  sommaire  tout  ce  que  nous  pouvons  demander  a  Dieu,  et  ce  qui  nous  est  licite  d'appeter.  Mais  cependant  cela  n'empeche  pas  que  si  un  homme  est  presse  d'angoisse,  il  ne  retourne  souvent  a  Dieu:  et  quand  il  aura  iette  quelques  souspirs,  que  tantost  apres  il  ne  recommence.  Quand  donc  nous  y  allons  sans  ambition  et  sans  parade,  et  puis  que  nous  ne  pensons  pas  avoir  par  nostre  babil  impetre  aucune  chose,  mais  que  l'affection  vehemente  nous  pousse?  Voyla  comment  nous  avons  une  vraye  perseverance,  a  l'exemple  de  nostre  Seigneur  Iesus  Christ.  Or  il  y  a  cest  article  a  noter  que  nous  avons  touche  ascavoir  que  le  principal  de  toutes  nos  requestes,  c'est  que  Dieu  domine  sur  nous  en  telle  sorte  qu'il  y  ait  un  accord  paisible  pour  nous  ranger  a  sa  bonne  volonte:  cela  di-ie,  nous  est  necessaire.  Voyla  nostre  Seigneur  Iesus  Christ,  combien  que  toutes  ses  affections  fussent  droites,  sainctes  et  conformes  a  iustice,  si  estce  neantmoins  que  d'autant  qu'il  estoit  homme  naturel,  encores  a-il  falu  qu'il  combatist  contre  l'angoisse  et  la  tristesse  qui  le  pouvait  saisir,  et  qu'il  se  tinst  la  captif  sous  l'obeissance  de  Dieu  son  Pere.  Que  sera-ce  donc  de  nous  qui  n'avons  que  toute  malice  et  rebellion,  et  qui  sommes  tant  corrompus  que  nous  ne  scaurions  appliquer  nos  sens  a  rien  qui  soit,  que  Dieu  n'y  soit  quant  et  quant  offense?  Puis  qu'ainsi  est,  en  priant  Dieu  apprenons  de  nous  tenir  tellement  en  bride,  qu'un  chacun  ne  se  donne  point  une  licence  telle  qu'on  a  accoustume  de  suyvre  ses  appetis  propres:  mais  scachons  que  nous  aurons  beaucoup  proufite,  nous  pouvans  tenir  captifs,  afin  que  Dieu  ait  toute  maistrise  par  dessus  nous.  Il  y  a  aussi  une  sentence  bien  notable,  quand  nostre  Seigneur  Iesus  dit  a  ses  disciples,  Veillez  et