46:842  soyons  touchez  du  iugement  de  Dieu,  pour  en  estre  espouvantez.  Mais  cependant  si  faut-il  que  nous  levions  la  teste,  quand  Dieu  nous  appelle  a  soy.  Et  voyla  aussi  le  courage  qui  est  donne  a  tous  fideles  :  comme  nous  voyons  que  S.  Paul  dit  que  Iesus  Christ  ha  la  couronne  apprestee  pour  tous  ceux  qui  attendent  sa  venne.  Si  donc  nous  n'avons  nulle  esperance  de  vie  en  venant  devant  le  Iuge  celeste,  il  est  certain  que  nous  serons  reiettez  de  luy,  et  qu'il  ne  nous  cognoistra  point,  mesmes  qu'il  nous  desavouera,  combien  que  nous  facions  profession  de  Chrestiente.  Or  ceste  attente  de  nostre  Seigneur  Iesus  Christ  ne  peut  estre,  sinon  que  nous  soyons  resolus  et  persuadez  qu'il  a  tellement  combatu  contre  les  frayeurs  de  la  mort,  que  toutesfois  nous  en  sommes  affranchis,  et  que  la  victoire  nous  est  acquise.  Et  encores  que  nous  ayons  a  batailler,  pour  nous  faire  sentir  nos  infirmitez,  pour  nous  faire  recourir  a  Dieu,  pour  tousiours  nous  attirer  a  une  vraye  confession  de  nos  pechez,  tellement  que  Dieu  soit  luy  seul  declare  iuste,  si  est-ce  neantmoins  que  nous  sommes  asseurez  que  Iesus  Christ  a  tellement  combatu  qu'il  a  acquis  ia  victoire,  non  point  pour  luy,  mais  pour  nous,  et  qu'il  ne  faut  point  douter  que  par  son  moyen  nous  ne  puissions  maintenant  surmonter  toutes  solicitudes,  toutes  craintes,  tous  effrois,  et  que  puissions  invoquer  Dieu  estans  asseurez  que  tousiours  il  ha  les  bras  estendus  pour  nous  recevoir  a  soy.  Voyla  donc  ce  que  nous  avons  a  observer,  afin  que  nous  scachions  que  ce  n'est  point  une  doctrine  speculative,  quand  il  est  que  nostre  Seigneur  Iesus  a  endure  les  frayeurs  horribles  de  la  mort,  d'autant  qu'il  a  senti  qu'il  estoit  la  devant  nostre  iuge,  comme  nostre  plege,  afin  qu'auiourd'huy  nous  puissions  en  vertu  de  ce  combat  gaigner  sur  toutes  nos  infirmitez,  et  persister  constamment  en  l'invocation  du  nom  de  Dieu,  ne  doutans  point  qu'il  ne  nous  exauce,  et  qu'il  n'ait  tousiours  sa  bonte  preste  pour  nous  recevoir  a  soy:  et  que  par  ce  moyen  nous  passerons  et  par  vie  et  par  mort,  et  par  eau  et  par  feu:  et  que  nous  sentirons  que  ce  n'est  pas  en  vain  que  nostre  Seigneur  Iesus  a  combatu  pour  acquerir  une  telle  victoire  pour  tous  ceux  qui  sont  venus  a  luy  par  foy.  Voyla  donc  en  somme  ce  que  nous  avons  a  retenir.  Or  cependant  nous  voyons  comme  il  nous  faut  combatre  contre  nos  affections,  et  que  sans  cela  il  est  impossible  que  nous  remuyons  un  doigt  que  nous  ne  provoquions  quant  et  quant  l'ire  de  Dieu.  Car  voyla  nostre  Seigneur  Iesus  Christ  qui  est  pur  et  entier,  comme  desia  nous  avons  declare  :  que  si  on  demande  quelle  a  este  sa  volonte,  il  est  vray  qu'elle  estoit  infirme,  comme  d'un  homme:  mais  elle  n'estoit  pas  vicieuse,  comme  de  ceux  qui