46:840  si  nous  l'estimons  par  nos  personnes.  Car  quand  nous  aurons  une  bonne  fin,  et  qu'une  affection  sera  droite  de  soy  et  approuvee  de  Dieu,  r  si  est-ce  ce  que  nous  y  faudrons  tousiours.  N'est-ce  pas  une  bonne  chose  et  saincte  qu'un  pere  aime  ses  enfans?  Et  tant  y  a  qu'en  cela  nous  pechons  encores:  car  il  n'y  a  iamais  regle  ni  moderation  telle  qu'il  seroit  requis:  car  en  toutes  les  vertus  qui  pourront  estre  en  nous,  Dieu  encores  nous  y  fait  appercevoir  des  vices,  afin  que  tout  orgueil  soit  mieux  abbatu,  et  que  nous  ayons  tousiours  occasion  de  baisser  la  teste,  voire  d'estre  confus  en  vergongne,  voyant  que  le  bien  mesme  est  corrompu  par  le  peche  qui  habite  ainsi  en  nous,  et  duquel  nous  sommes  tous  remplis  et  farcis.  Au  reste,  quant  a  nostre  Seigneur  Iesus  Christ  (comme  i'ay  desia  dit)  il  ne  se  faut  point  esbahir  s'il  a  eu  (entant  qu'il  estoit  homme)  une  volonte  diverse  de  celle  de  Dieu  son  Pere:  mais  par  cela  il  ne  faut  pas  iuger  qu'il  y  ait  eu  aucun  vice  ni  transgression  en  luy.  Et  mesmes  (comme  desia  nous  avons  touche)  en  cela  voyons  nous  l'amour  inestimable  qu'il  nous  a  porte,  quand  ceste  mort  luy  a  este  si  espouvantable,  et  que  neantmoins  il  s'y  est  assuietit  de  son  bon  gre.  Et  aussi  quand  il  n'y  eust  point  eu  nulle  repugnance,  et  que  sans  contredit  il  eust  hume  ce  breuvage,  sans  y  sentir  nulle  amertume,  et  qu'est-ce  este  de  nous  avoir  ainsi  rachetez?  Il  sembleroit,  seulement  que  ce  fust  un  ieu:  mais  quand  il  a  fallu  que  nostre  Seigneur  Iesus  Christ  endurast  telles  angoisses,  c'est  signe  qu'il  nous  aimoit,  tellement  qu'il  s'est  oublie  soy-mesme,  et  a  souffert  que  tout  l'orage  tombast  sur  sa  teste,  afin  que  nous  fussions  delivrez  de  l'ire  de  Dieu.  Or  il  reste  maintenant  a  noter,  quand  le  Fils  de  Dieu  a  este  angoisse  en  telle  sorte,  que  ce  n'a  pas  este  pour  ce  qu'il  avoit  a  partir  du  monde:  car  s'il  n'y  eust  eu  sinon  la  separation  du  corps  et  de  l'ame,  avec  les  torments  qu'il  devoit  endurer  en  son  corps,  cela  ne  l'eust  pas  ainsi  afflige.  Mais  il  nous  faut  observer  la  qualite  de  sa  mort,  et  mesme  venons  a  l'origine.  Car  la  mort  n'est  pas  seulement  pour  dissoudre  l'homme,  mais  pour  luy  faire  sentir  la  malediction  de  Dieu.  Outre  ce  que  Dieu  nous  retire  de  ce  monde,  et  que  nous  sommes  comme  abolis  quant  a  la  vie  presente,  la  mort  nous  est  une  entree  comme  au  gouffre  d'enfer.  Il  nous  faut  donc  estre  alienez  de  Dieu,  et  retranchez  de  toute  esperance  de  salut,  quand  il  nous  est  parle  de  la  mort,  voire  sinon  que  nous  ayons  ce  remede,  c'est  que  nostre  Seigneur  Iesus  Christ  l'a  enduree  pour  nous,  afin  que  maintenant  la  playe  qui  y  estoit  ne  soit  plus  mortelle.  Car  sans  luy  nous  estions  tellement  navrez  par  la  mort  qu'il  n'y  avoit  plus  d'esperance  de  salut  pour  nous:  mais  maintenant  la