58:84  et  grande  suite:  aimons  mieux,  di-ie,  de  n'avoir  pas  si  grand  estat,  et  nous  maintenir  en  sobriete,  que  d'estre  riches  et  opulens,  et  cependant  nous  oublier,  et  d'avoir  toute  nostre  resiouissance  ici  bas.  Quand  nous  en  ferons  ainsi,  voila  comme  nous  ensuivrons  l'exemple  de  nostre  pere  Iacob.  Or  i'ay  desia  dit  qu'il  n'est  pas  question  seulement  de  quitter  nos  aises  et  nos  commoditez,  mais  nostre  vie  propre,  quand  il  sera  question.  Car  s'il  faut  pour  rendre  confession  de  nostre  foy,  telle  que  Dieu  la  demande,  et  pour  glorifier  le  Nom  de  nostre  Seigneur  Iesus  Christ,  que  nous  mourions,  et  qu'il  faille  passer  la:  aussi  faut  il  quitter  nostre  vie  mesme  et  tout  ce  qui  en  depend:  et  si  nous  ne  le  faisons,  nous  monstrons  que  nous  ne  savons  que  c'est  d'avoir  gouste  les  biens  spirituels,  que  nous  en  avons  perdu  le  goust,  d'autant  que  le  diable  nous  a  enyvrez  de  ses  poisons,  et  nous  a  ensorcelez  et  rendus  stupides.  Nous  voyons  maintenant  combien  ceste  histoire  nous  est  utile:  car,  outre  ce  que  nous  avons  dit,  Que  Dieu  a  ratifie  son  election,  et  qu'il  a  descouvert  ce  qui  estoit  en  Esau  et  en  Iacob  :  ici  nostre  pere  Iacob  nous  tend  la  main  et  nous  monstre  que  toutes  les  voluptez  de  ce  monde  ne  nous  doivent  rien  estre,  mesme  iusques  a  nostre  nourriture,  quand  il  seroit  question  d'estre  comme  povres  gens  affamez,  que  nous  laissions  plustost  le  boire  et  le  manger,  quand  il  sera  tout  appreste,  que  mesme  le  flair  nous  aura  incite,  que  nous  cuiderons  desia  avoir  les  morceaux  en  la  bouche,  et  les  avaller,  quand  nous  en  serions-la,  neantmoins  que  nous  entrions  en  un  tel  combat  contre  nousmesmes,  que  nous  renoncions  a  nostre  naturel,  et  mesme  a  ce  qui  ne  sera  pas  condamne  du  coste  des  hommes,  s'il  nous  empesche  de  venir  a  Dieu,  s'il  nous  retarde,  ou  nous  enveloppe  ici  bas  en  quelques  corruptions.  Voila  ce  qu'il  nous  faut  faire.  Et  au  reste,  que  nous  avisions  d'un  autre  coste,  de  ne  point  ressembler  a  Esau,  et  ne  point  alleguer  ceci  et  cela,  comme  beaucoup  diront,  O  voila,  si  faut-il  vivre.  Nous  pourrons  avoir  nos  excuses  devant  les  hommes  :  mais  si  faut-il  venir  a  conte  devant  le  grand  Iuge,  lequel  nous  a  declare  qu'il  veut  que  nous  prisions  tellement  le  thresor  de  salut,  qu'il  nous  a  offert  en  l'Evangile,  que  nous  apprenions  de  nous  retirer  de  ce  monde,  et  que  tout  ce  qui  y  est  ne  nous  soit  rien  au  prix.  Or  ceci  se  pratique  en  beaucoup  d'especes  et  de  facons  :  car  quand  un  homme  Chrestien  auroit  dequoy,  s'il  est  sobre  en  son  boire  et  en  son  manger,  et  qu'il  ne  gourmande  pas,  en  sorte  qu'il  en  perde  et  sens  et  memoire,  mais  qu'il  soit  tousiours  dispose  de  rendre  action  de  graces  a  Dieu,  d'executer  la  charge  ou  il  est  appele,  et  de  s'employer  a  ce  qui  est  de  sa  vocation  et  de  son  estat,  si  un  homme  donc  est  ainsi  temperant,  il  ressemble  a  Iacob:  car  il  quitte  le  boire  et  le  manger,  non  pas  qu'il  n'use  des  biens  que  Dieu  lui  a  mis  en  main,  mais  il  les