45:84  Quod  sincere  ex  scriptura  respondent  scribae  et  pontifices  (qui  tamen  postea  furiose  corrumpere  totam  scripturam  conati  sunt,  ne  Christo  nomen  darent),  ideo  factum  est,  quia  nondum  molestus  erat  illis  Christus  cum  suo  evangelio.  Sic  omnes  impii  in  generalibus  principiis  Deo  facile  subscribunt,  sed  ubi  propius  eos  urgere  incipit  Dei  veritas,  contumaciae  suae  virus  evomunt.  Cuius  rei  hodie  illustre  cernimus  exemplum  in  papistis.  Christum  enim  sine  controversia  fatentur  unigenitum  Dei  filium,  carne  nostra  indutum,  et  in  duabus  naturis  unam  Dei  et  hominis  personam  agnoscunt:  sed  ubi  ventum  est  ad  Christi  virtutem  et  officium,  mox  ardet  conflictus,  quia  in  ordinem  se  cogi  non  sustinent,  ac  multo  minus  in  nihilum  redigi.  In  summa,  quatenus  nihil  sibi  decedere  putabunt  impii,  Deo  et  scripturae  aliquid  reverentiae  concedent.  Sed  ubi  consertis  manibus  cum  ambitione,  avaritia,  fastu,  perversa  fiducia,  hypocrisi  et  fraudibus  confligit  Christus,  tunc  omnis  modestiae  obliti  in  rabiem  feruntur.  Sciamus  ergo,  hostibus  veritatis  praecipuam  excaecationis  causam  esse  pravos  affectus,  qui  lucem  in  tenebras  convertunt.  6.  Ut  tu  Bethlehem.  Non  dubium  est,  quin  scribae  fideliter  sua  lingua  verborum  contextum  citaverint,  qualis  exstat  apud  prophetam.  Sed  Matthaeus  satis  habuit  locum  notare.  Et  quia  graece  scribebat,  receptam  lectionem  sequutus  est.  Nam  ex  hoc  loco  et  similibus  colligere  promptum  est,  lingua  hebraica  non  fuisse  compositum  ab  eo  evangelium.  Porro  hoc  semper  observandum  est,  quoties  aliquod  scripturae  testimonium  citant  apostoli,  quamvis  non  reddant  verbum  ex  verbo,  imo  interdum  longe  discedant,  congruenter  tamen  et  apposite  ab  illis  ad  causam  accommodari.  Quare  semper  attendant  lectores,  quorsum  adducant  evangelistae  scripturae  locos,  ne  scrupulose  in  singulis  verbis  insistant,  sed  contenti  sint  hoc  uno,  quod  scriptura  nunquam  ab  illis  torquetur  in  alienum  sensum,  sed  proprie  in  genuinum  usum  aptatur.  Porro  quum  illis  propositum  fuerit,  infantes  et  in  fide  jnovicios  lactis  potu  alere,  qui  solidum  cibum  nondum  capere  poterant,  nulla  religio  impedit,  quominus  diligenter  et  exacte  inquirant  filii  Dei,  quid  contineat  scriptura,  atque  ita  gustus,  quem  praebent  apostoli,  eos  ad  fontem  deducat.  Nunc  redeamus  ad  vaticinium  Michae  5,  1:  sic  ad  verbum  legitur  apud  prophetam,  Et  tu  Bethlehem  Ephrata,  parvula  ut  sis  in  millibus  Iuda,  ex  te  mihi  egredietur,  qui  sit  dominator  in  Israel.  Pro  Ephrata  Matthaeus  Iuda  posuit,  sed  eodem  sensu.  Micha  enim  Bethlehem,  de  qua  loquitur,  tantum  hac  nota  discernere  voluit  ab  altera,  quae  erat  in  tribu  Sebulon.  In  reliquo  contextu  plus  est  difficultatis.  Dicit  enim  propheta,  exiguam  esse  Bethlehem,  quae  censeatur  inter  praefecturas  Iuda:  Matthaeus  contra  digni*