10.1:84  tributi,  pro  suo  quisque  captu  excipiant.  Mox  vero  omnium  classium  scholastici,  permutatis  auditoriis,  ex  tempore,  nullis  inspectis  libris,  thema  propositum  in  latinum  sermonem,  suo  quisque  marte,  intra  quintam  horam  convertunto:  et  ne  qua  hic  fraus  fiat,  secundae  classis  praeceptor  scholasticis  primae  classis,  primus  secundae,  et  ita  deinceps,  praeesto.  Qui  praeerunt,  diligenter  omnia  inspicinnto,  et  sine  ullo  dolo  administranto.  Themata  collecta  et  ordine  decuriarum  distributa,  singuli  praeceptores  ad  ludimagistrum  bona  fide  afferunto.  Rector  postridie  et  sequentibus  diebus  usque  ad  Calendas  Maii,  adhibitis  professoribus  publicis,  singularum  classium  themata  ordine  expendat:  annotatis  erroribus,  ipsisque  scholasticis  praesente  praeceptore  decuriatim  vocatis  et  auditis,  ad  quem  quisque  gradum  sit  promovendus  ex  assessorum  sententia  decernito.  Calendis  Maii  (nisi  forte  in  diem  Dominicum  inciderint:  tum  enim  in  posterum  diem  ista  reiicientur)  tota  schola  in  S.  Petri  forum  convenito.  Adesto,  si  ita  videbitur  amplissimo  Senatui,  ex  Syndicis  aut  Senatoribus  aliquis,  una  cum  ministris  verbi  et  professoribus,  ludimagistro  et  hypodidascalis,  in  quorum  [pag.  20]  coetu  Rector  scholae  leges  istas  publice  clara  voce  recitatas  brevi  oratione  commendato.  Deinde  ex  singulis  classibus  bini,  qui  caeteros  visi  fuerint  diligentia  et  eruditione  superasse,  ex  praesentis  D.  Syndici  vel  Senatoris  manu  praemiolum  quod  visum  fuerit  amplissimo  Senatui,  accipiunto  et  reverenter  gratias  agunto.  Postea  audita  brevi  collaudatione  ex  ore  Rectoris,  si  quid  habent  primae  vel  secundae  classis  scholastici  vel  soluta  oratione  vel  carmine  scriptum,  modeste  recitanto:  ac  tandem  gratiis  actis  a  Rectore,  et  peractis  precibus,  conventus  dimittitor.