58:83  CINQUIEME  SERMON  84  l'Ecriture  sainte.  Quand  ie  di,  Que  le  monde  ne  les  empesche  point:  ie  n'enten  pas  seulement  les  cupiditez  meschantes,  comme  d'yvrongnerie,  de  paillardise,  d'avarice  et  choses  semblables:  mais  des  appetis  qui  ne  seront  point  condamnez:  comme  le  boire  et  le  manger  nous  sera  permis  de  Dieu,  mais  si  le  boire  et  le  manger  nous  destourne  que  nous  ne  servions  a  Dieu,  il  faut  alors  nous  forcer  tellement,  que  nos  appetis  soient  domtez.  Or  ceci  s'entendra  mieux  par  l'experience  commune  que  nous  avons.  Voila  un  homme  qui  pourroit  vivre  en  delices  et  en  voluptez,  il  pourroit  avoir  a  manger  son  soul,  voire  et  de  bonnes  viandes,  et  friandes  et  delicates,  et  exquises  :  mais  il  faudroit  qu'il  pendist  sa  conscience  au  croc,  comme  on  dit,  ou  bien  qu'il  profanast  avec  le  monde.  Car  il  y  a  beaucoup  d'estats  qui  seront  proposez  a  plusieurs,  qui  sont  autant  d'allechemens  de  Satan.  La  dessus  ils  penseront,  O,  si  i'estoie  en  tel  estat,  ie  pourroy  e  acquerir  beaucoup  de  biens,  et  puis  ie  seroye  en  grand  honneur,  tout  le  monde  me  feroit  la  cour:  cependant  i'auroye  ma  table  bien  garnie,  i'auroye  dequoy  me  nourrir  a  souhait:  et  mesme  en  ma  vieillesse,  quand  i'auroye  acquis  rentes  et  revenus,  ie  seroye  asseure  de  vivre  bien  a  mon  aise.  Or  ie  n'y  puis  parvenir.  Mais  a  quoy  tient-il?  C'est,  que  ie  ne  le  pourroye  faire  sans  estre  en  grand  danger  de  me  debaucher,  et  mesmes  sans  m'alliener  du  tout  de  Dieu  :  quoy  qu'il  en  soit,  ie  ne  le  pourroye  pas  servir  purement,  comme  il  le  commande.  Or  si  un  homme  est  tente  de  cela,  il  est  certain  qu'il  ressemble  a  Esau,  s'il  choisit  ceste  condition  qui  lui  sera  plus  propre  selon  le  monde,  et  que  cependant  il  quitte  les  moiens  qu'il  a  de  servir  de  Dieu,  et  de  vivre  en  repos  et  en  tranquillite  de  conscience.  Car  il  ne  considere  pas,  Ie  suis  un  homme  fragile,  et  a  grand  peine,  me  puis-ie  retenir  en  la  crainte  de  Dieu,  combien  que  i'y  soye  exhorte  tous  les  iours,  et  mesmes  que  ie  m'y  addonne  et  m'y  efforce,  et  que  sera-ce  quand  ie  n'auray  nulle  Parole  de  Dieu,  que  ie  ne  seray  pas  exhorte  a  faire  mon  devoir,  et  que  ie  seray  entortille  parmi  beaucoup  d'affaires  et  negoces  de  ce  monde?  Si  un  homme  ne  pense  point  a  tout  cela,  et  qu'il  choisisse  bonne  table,  c'est  a  dire  un  estat  par  lequel  il  se  puisse  enrichir  tantost,  il  est  certain  qu'il  ressemblera  a  Esau.  Au  contraire,  quand  nous  penserons,  Or  sus,  il  est  vray  que  nous  pourrions  estre  a  nostre  aise,  si  nous  voulions  quitter  Dieu,  ou  bien  nous  destourner  de  lui,  et  decliner  tant  peu  que  ce  soit  du  bon  chemin.  Mais  quoy?  Le  diable  incontinent  trouvera  des  astuces  nouvelles  pour  nous  debaucher  du  tout,  tellement  que  nous  serons  comme  gens  perdus.  Or  prevenons  un  tel  danger,  et  que  nous  aimions  mieux  avoir  faim  et  soif,  ou  bien  avoir  a  manger  estroittement,  et  n'avoir  pas  grand  pompe