52:83  83  EPIST.  PAULI  AD  COLOSSENSES  84  obducere  ad  Christum  obscurandum:  quia  scit,  hoc  modo  ianuam  apertam  esse  quibuslibet  mendaciis,  Haec  igitur  sola  est  ratio  tam  retinendae,  quam  restituendae  purae  doctrinae,  Christum  ponere  ob  oculos  qualis  est  cum  bonis  suis  omnibus:  ut  virtus  eius  vere  sentiatur.  Hic  non  agitur  de  nomine.  Papistae  communiter  nobiscum  unum  Christum  confitentur:  quantum  interea  inter  nos  et  illos  interest?  Nempe  quia  illi,  dum  confessi  sunt  Christum  esse  filium  Dei,  virtutem  eius  transferendo  ad  alios,  hucque  et  illuc  distrahendo,  prope  inanem  ipsum  relinquunt:  saltem  spoliant  eum  magna  parte  suae  gloriae:  ut  nominetur  filius  Dei,  non  sit  tamen  qualem  pater  erga  nos  esse  voluit.  Quod  si  papistae  ex  animo  reciperent  quae  hoc  capite  continentur,  mox  inter  nos  conveniret:  sed  concideret  totus  papatus,  quia  non  stat  nisi  Christi  ignoratione.  Hoc  procul  dubio  agnoscet  quisquis  statum  primi  huius  capitis  considerabit.  Nihil  enim  aliud  hic  agitur,  nisi  ut  sciamus  Christum  esse  principium,  medium,  et  finem  :  ab  ipso  omnia  petenda  :  extra  ipsum  nihil  esse,  nec  posse  inveniri.  Nunc  igitur  sedulo  et  acriter  observent  lectores,  quibus  coloribus  Christum  nobis  Paulus  depingat.  Qui  nos  fecit  idoneos.  Adhuc  de  patre  loquitur  :  quia  est  principium  et  causa  efficiens  (ut  loquuntur)  nostrae  salutis.  Ut  nomen  Dei  maiestatem  clarius  exprimit,  ita  nomen  patris  clementiam  et  benevolum  affectum.  Utrumque  intueri  nos  in  Deo  convenit,  ut  maiestas  timorem  et  reverentiam  nobis  incutiat,  paternus  amor  fiduciam  nobis  conciliet.  Itaque  haec  duo  non  frustra  coniunxit  Paulus:  si  tamen  placet  lectio  quam  sequutus  est  vetus  interpres,  cui  suffragantur  vetustissimi  quidam  graeci  codices.  Quamquam  nihil  erit  absurdi  si  dicamus  patris  voce  fuisse  contentum.  Deinde  sicuti  necesse  est  gratiam  eius  incomparabilem  patris  nomine  exprimi:  ita  etiam  non  minus  necesse  est  nos  Dei  nomine  rapi  in  admirationem  tantae  bonitatis,  quod  is,  qui  Deus  est,  eo  usque  se  demiserit.  Cuius  autem  beneficii  Deo  agit  gratias?  Quod  se  et  alios  reddiderit  idoneos  ad  participandam  sanctorum  haereditatem.  Nascimur  enim  filii  irae,  exsules  a  regno  Dei:  sola  est  Dei  adoptio  quae  nos  efficit  idoneos.  Adoptio  autem  a  gratuita  electione  pendet.  Spiritus  regenerationis,  est  adoptionis  sigillum.  Addidit,  in  lumine,  ut  esset  antitheton  quod  tenebris  regni  Satanae  opponeretur.  13.  Qui  eripuit  nos.  En  principium  salutis  nostrae,  quum  nos  Deus  eripit  e  profundo  exitii  in  quo  demersi  sumus.  Nam  ubi  abest  eius  gratia,  illic  tenebrae:  quemadmodum  habetur  apud  Iesaiam  (60,  2),  Ecce  tenebrae  operient  terram,  et  caligo  populos:  super  te  autem  orietur  Dominus,  et  gloria  eius  in  te  videbitur.  Primum  nos  ipsi  tenebrae  vocamur  :  deinde  totus  mundus  :  et  Satan  princeps