15:83  83  EPISTOLAE  1930.1932  84  In  hoc  gravissime  ab  illis  accusor  quod  negem  panem  et  vinum  coenae  dominicae  signa  esse,  sed  institutam  a  Christo  Domino  illorum  distributionem  et  participationem.  Dicuntque  hac  doctrina  praeripi  omnem  spem  concordiae  in  re  sacramentaria  instituendae,  eo  quod  non  tantum  id  adimatur  pani  et  vino  coenae  ut  corpus  et  sanguinem  Christi  complectantur  sed  ne  signa  quidem  coenae  esse  etiam  dicantur.  Alias  quidem  potuisse  sperari  aliquam  concordiam  dum  panis  et  vinum  symbola  corporis  et  sanguinis  Christi  vocarentur,  et  concederetur  haec  symbola  esse,  non  tantum  significata,  sed  etiam  exhibitiva.  Sed  iam  frustra  cogitandum  esse  de  concordia,  dum  illa  signa  etiam  coenae  esse  negamus.  Quasi  vero  panis  et  vinum  in  coena  corporis  et  sanguinis  Christi  symbola  esse  non  possint,  si  illa  coenae  ipsius  signa  esse  negemus,  imo  vero  quasi  non  eadem  ipsa  opera  doceamus  panem  et  vinum  in  coena  esse  signa  corporis  et  sanguinis  Christi,  dum  eorum  participationem  signum  in  coena  esse  docemus  nostrae  cum  Christo  Domino  communionis  in  corpore  et  sanguine  ipsius,  nisi  quod  quemadmodum  coenae  mysterium  non  est  substantia  corporis  Christi  naturalis,  sed  nostra  in  corpore  Christi  cum  ipso  communio,  ita  signum  quoque  coenae  esse  non  possit  panis  ipse  aut  vinum  in  coena,  sed  illorum  participatio  ut  est  a  Christo  Domino  instituta.  Sed  isti  non  vident  aliud  esse  coenam  ipsam,  aliud  vero  corpus  Christi,  ut  etiamsi  panem  et  vinum  in  coena  signum  coenae  ipsius  esse  negemus,  nihilominus  tamen  illa  corporis  et  sanguinis  Christi  symbola  cum  catholica  Christi  ecclesia  esse  doceamus.  Tantum  hoc  in  prospectu  habent:  quod  dum  panem  et  vinum  signa  coenae  esse  negamus,  sibi  vident  omnem  occasionem  constituendae  suae  illius  unionis  corporis  Christi  cum  pane.8)  Ut  enim  communio  nostra  cum  Christo  Domino  in  corpore  ipsius  non  opus  habet  ulla  reali,  ut  vocant,  corporis  ipsius  per  manum  ministri  exhibitione,  quatenus  quidem  fide  constat,  ita  neque  in  signo  ipsius  (nempe  enim  panis  et  poculi  participatione)  multo  minus  aut  in  ipso  pane  ac  vino  opus  sit  ulla  omnino  reali  corporis  Christi  ac  sanguinis  inclusione  aut  eius  exhibitione.  Hoc  vident  (inquam)  et  proinde  per  me  fieri  clamant,  ut  omnis  spes  concordiae  praeripiatur  omnino.  Mitto  tibi  libellum  pastoris  Hamburgensis9),  quem  scio  te  sine  nausea  non  esse  lecturum,  sed  tamen  vellem  ut  illi  per  virum  aliquem  responderetur,  non  tam  propter  ipsum  quam  propter  alios  qui  ab  illo  pendere  videntur.  Scripsit  et  farraginem  opinionum  inter  se,  ut  ipse  fingit,  dissidentium10)