46:826  Ainsi  donc,  notons  que  ce  dernier  poinct  yci  est  notamment  exprime,  pour  advertir  ceux  qui  ont  la  charge  de  porter  la  parole  de  Dieu,  que  s'ils  sont  hais,  s'ils  sont  blasmez,  si  on  detracte  d'eux,  encores  qu'ils  taschent  de  bien  faire  et  de  s'aquitter  de  leur  devoir,  ils  avisent  a  ne  laisser  point  pour  cela  de  poursuyvre  tousiours  leur  train:  et  c'est  une  doctrine  commune  a  tous,  c'est  a,  dire  de  laquelle  le  profist  estend  a  tous  les  membres  de  l'Eglise:  c'est  ascavoir  que  nous  apprenions  de  ne  point  louer  et  magnifier  ceux  ausquels  on  applaudit  de  tous  costez,  d'autant  qu'ils  ne  demandent  qu'a  flatter  pour  acquerir  faveur.  Que  donc  nous  avisions  de  ne  point  priser  telles  gens,  si  nous  ne  voulons  estre  condamnez  de  Dieu  en  approuvant  le  mal:  mais  que  nous  apprenions  de  louer  ceux  qui  ne  cherchent  point  a  gaigner  bruit  et  credit  par  flatteries,  mais  qui  reiettent  tout  ce  qui  les  pourroit  empescher  de  s'acquitter  deuement  de  leur  devoir.  Quand  nous  aurons  cela,  nous  accomplirons  ce  qui  est  dit  au  Pseaume,  de  benir  ceux  qui  vienent  au  nom  de  Dieu:  iusques  a  ce  qu'il  nous  recueille  en  son  Royaume  eternel,  la  ou  nous  iouirons  de  tous  les  biens  qui  nous  sont  maintenant  promis,  et  que  nous  attendons.  Or  nous-nous  prosternerons  devant  la  maieste  de  nostre  bon  Dieu,  etc.