50:82  tamen  est,  nondum  fuisse  omnes  convictos,  ut  consilium  quod  dabat,  amplecterentur.  Ideo  de  angustia  viscerum  conquestus  est,  quae  sola  profectum  remorabatur.  Non  retexit  autem  denuo  illud  argumentum,  sed  brevi  admonitione  contentus  est:  ut  facere  solemus  quum  agimus  de  rebus  notis.  Quamquam  non  obstat  brevitas  quin  acriter  tamen  pungat.  Quantum  enim  vehementiae  inest  in  hoc  solo  verbo,  quum  nullam  esse  conventionem  docet  templo  Dei  cum  idolis?  Sacrilega  est  profanatio,  si  in  templum  Dei  idolum  vel  cultus  aliquis  idololatricum  inferatur:  nos  porro  sumus  vera  Dei  templa:  ergo  sacrilegium  est  ulla  idolorum  contagione  nos  inficere.  Haec,  inquam,  una  ratio  instar  mille  esse  debet,  si  tu  Christianus  es,  quid  tibi  negotii  cum  idolis?  tu  enim  templum  es  Dei.  Sed  Paulus  (ut  iam  attigi)  exhortatione  pugnat  magis  quam  doctrina,  quia  supervacuum  fuisset  quasi  de  re  dubia  vel  obscura  adhuc  disserere.  Quemadmodum  dicit:  Habitabo.  Probat  nos  esse  templa  Dei  ex  eo  quod  promisit  olim  Deus  populo  israelitico,  se  habitaturum  in  medio  eius.  Primum  non  potest  habitare  Deus  inter  nos,  quin  habitet  in  unoquoque  nostrum.  Singularis  enim  beneficii  loco  nobis  hoc  promittit,  habitabo  in  medio  vestri.  Neque  haec  habitatio  vel  praesentia  terrenis  duntaxat  benedictionibus  constat,  sed  praesertim  de  spirituali  gratia  accipienda  est.  Ergo  non  tantum  nobis  propinquum  esse  Deum  notat,  quasi  in  aere  degat,  ut  nos  circum  volitet:  sed  magis  significat  sedem  in  cordibus  nostris  habere.  Si  quis  ergo  obiiciat,  particulam  in  nihil  aliud  valere  quam  inter,  ego  concedo:  sed  ex  eo,  quod  Deus  se  inter  nos  habitaturum  promittit,  colligi  dico  in  nobis  quoque  ipsum  manere.  Ac  tale  erat  arcae  symbolum,  cuius  fit  mentio  apud  Mosen  in  eo  loco  unde  Paulus  testimonium  hoc  mutuatus  videtur,  nempe  Levit.  26,  12.  Si  quis  autem  Paulum  ad  caput  Ezechielis  37,  27  respexisse  magis  putet,  eadem  erit  ratio.  Propheta  enim  in  describenda  ecclesiae  instauratione  tanquam  praecipuum  bonum  Dei  praesentiam  commemorat,  quam  initio  promiserat  ipse  per  Mosen.  Iam  vero  quod  per  arcam  figuratum  fuit,  plenius  nobis  exhibitum  fuit  in  Christo,  quum  nobis  factus  est  Immanuel.  Unde  fit  ut  potius  Ezechielem  hic  citari  arbitrer  quam  Mosen:  quod  Ezechiel  simul  ad  symbolum  arcae  alludit,  et  pronuntiat  fore  ut  id  impleatur  sub  regno  Christi.  Porro  apostolus  pro  confesso  sumit,  Deum  nusquam  habitare  nisi  in  loco  sacro.  De  homine  si  dicatur,  hic  habitat:  non  erit  protinus  templum,  sed  domus  profana.  Sed  in  Deo  hoc  speciale  est,  qui  quemcunque  locum  dignatur  sua  praesentia,  etiam  sanctificat.  17.  Quamobrem  exite  de  medio  eorum.  Haec  exhortatio  ex  Iesaiae  capite  52,  l  l  sumpta  est:  ubi  propheta  liberationem  populo  denuntians  tan-  6