39:82  animalium.  Hinc  fit  ergo,  ut  quum  Deus  sepulcro  nos  dignatur,  declaret  paternum  erga  nos  favorem.  Ex  adverso,  si  proiicitur  alicuius  cadaver,  signum  est  irae  Dei  per  se,  sicuti  antea  visum  fuit,  quum  dicebat  propheta,  Sepultura  asini  sepelietur,  de  Iechonia.  Sicuti  ergo  minatus  fuit  Iechoniae  sepulturam  asini,  ita  nunc  promittit  Zedechiae  sepulturam.  Dixi  hoc  esse  verum  ubi  res  per  se  aestimatur.  Nam  continget  interdum  ut  sceleratissimus  sepeliatur  cum  honore,  et  magna  pompa.  Filii  autem  Dei  vel  exurantur,  vel  Iacerentur  a  feris  bestiis.  Nota  est  illa  Psalmi  (79,  2)  querimonia,  proiecta  fuisse  cadavera  sanctorum,  fuisse  escam  bestiis  et  avibus.  Dicitur  etiam  de  illo  splendido  divite,  mortuum  esse  et  sepultum  (Luc.  16,  22):  nulla  fit  mentio  sepulturae  Lazari.  Non  debemus  ergo  simpliciter  statuere  miseros  esse  qui  non  sepeliuntur,  beatos  autem  qui  obtinent  sepulcri  honorem.  Sed  quemadmodum  scimus  Deum  promiscue  benefacere  bonis  et  malis:  sicuti  sol  eius  dicitur  oriri  super  filios,  et  super  extraneos:  ita  etiam  post  mortem  sepultura  quum  temporale  sit  Dei  beneficium,  potest  promiscue  competere  bonis  et  malis.  Contra  vero  potest  fieri,  ut  Deus  privet  sepulcro  filios  suos,  sed  tamen  maneat  illud  fixum,  sepulturam  per  se  testimonium  esse  favoris  Dei:  contra,  ubi  quis  proiicitur,  et  negatur  ei  sepulcrum,  hoc  signum  esse  irae  Dei.  Interea  ubi  descendimus  ad  personas,  convertit  Dominus  poenam  temporalem  suis  in  salutis  adiumentum  :  deinde  beneficia  eius  temporalia  cedunt  in  graviorem  damnationem  omnibus  reprobis  et  impiis.  Ergo  barbari  fuerunt  qui  ludibrio  habere  ausi  sunt  sepulturam,  sicuti  videmus  etiam  Cynicos  fuisse  gloriatos  contemptu  sepulcri:  illa  fuit  inhumanitas.  Sed  haec  principia  tenenda  nobis  sunt,  sicuti  quum  Deus  suppeditat  nobis  panem,  vinum,  aquam,  et  reliqua  alimenta,  quum  nos  vegetat,  et  conservat  incolumes,  testari  suum  erga  nos  favorem:  idem  sentiendum  esse  de  sepultura.  Caeterum,  si  quando  esuriant  fideles,  si  frigore  etiam  aut  nuditate  pereant,  si  obnoxii  sint  aliis  omnibus  miseriis,  si  et  in  morte  et  post  mortem  ignominiose  tractentur,  hoc  totum  illis  cedere  in  salutem,  quia  Dominus  ipsis  consulit  etiam  dum  videtur  rebus  adversis  ipsos  affligere.  Haec  igitur  ratio  est  cur  propheta,  ut  mitiget  aliqua  ex  parte  dolorem  Zedechiae,  nunc  dicat,  Sepelient  te,  et  combustionibus  patrum  tuorum  comburent  te.  Haec  fuit  non  vulgaris  ratio  sepeliendi,  sed  regia.  Promittit  ergo  postquam  multis  contumeliis  et  probris  fuerit  obrutus,  tandem  mortuo  Deum  fore  propitium.  Et  quid  hoc  profuit  Zedechiae?  dicet  quispiam:  nihil,  quia  tunc  corpus  eius  carebat  sensu  :  sed  profuit  audire  hanc  Dei  clementiam,  quia  inde  colligere  potuit  Deum  tandem  fore  misericordem,  si  vere  se  et  serio  humiliaret.  Non  dubium  igitur  est,  quin  spes  veniae  6