27:82  estre  attentifs  a  penser  comment  c'est  que  nostre  Seigneur  s'est  declaire  pere,  et  sauveur,  et  de  nous,  et  de  tous  ies  siens:  quelle  excuse  y  aura-il?  Voici  donc  une  doctrine  qui  nous  attouche.  Car  si  iamais  Dieu  s'est  declaire,  il  est  certain  que  de  nostre  temps  nous  avons  veu  des  actes  dignes  de  memoire:  quand  ils  seront  recitez  d'ici  a  cent  ans  (si  le  monde  dure  si  longuement)  il  est  certain  que  ce  sera  pour  rendre  confus  ceux  qui  en  orront  parler:  tellement  que  nous  pourrons  bien  dire,  comme  il  est  dit  aux  Prophetes,  que  les  nouvelles  en  feront  corner  les  aureilles  a  ceux  qui  les  orront:  c'est  la  facon  de  parler  dont  les  Prophetes  usent.  Or  nous  avons  cogneu  et  experimente  ces  choses.  Si  ce  qui  en  sera  recite  a  l'advenir  doit  esmouvoir  le  peuple  qui  sera  adonc,  encores  qu'il  n'en  ait  rien  cogneu:  auiourd'huy  n'en  devons-nous  pas  estre  beaucoup  plus  esmeus?  Cela  ne  nous  doit-il  pas  percer  le  coeur?  ne  faut-il  pas  que  Satan  nous  ait  du  tout  hebetez,  quand  apres  avoir  apperceu  ainsi  la  grace  et  la  vertu  de  nostre  Dieu,  nous  n'y  voyons  goutte?  nous  marchons  tousiours,  et  n'en  sentons  rien.  Ceste  stupidite-la  est-elle  supportable  ?  Et  ainsi  pensons  a  nous:  et  mesmes  que  nous  recognoissions  comme  Dieu  a  besongne,  quand  il  nous  a  ici  recueillis,  et  que  nous  le  pouvons  adorer  purement,  comme  il  le  demande.  Qui  est  celuy,  soit  natif  de  la  ville,  soit  estranger,  qui  n'ait  bien  occasion  de  dire:  Voici  mon  Dieu  qui  s'est  declaire,  comme  si  i'avoye  veu  en  figure  visible  sa  main  forte  descendre  du  ciel  envers  moy.  Car  ceux  qui  sont  natifs  de  la  ville,  quelle  esperance  avoyent  ils  ici,  ni  d'estre  en  liberte,  ni  d'estre  mesmes  un  peuple  moyen:  qu'il  sembloit  que  tout  fust  dedie  a  saccagement,  et  que  tout  fust  desia  comme  perdu.  Quant  a  l'Evangile,  ce  n'estoit  qu'un  gouffre  d'enfer  en  superstitions,  et  en  diableries  (comme  on  voit  ainsi  par  tout)  et  les  abus,  et  idolatries,  et  toutes  les  prattiques  de  Satan  y  regnoyent  tellement,  qu'il  ne  sembloit  pas  qu'il  y  eust  iamais  lieu  a  la  grace  de  Dieu.  Et  ainsi  ceux  que  Dieu  a  visite  si  amiablement,  et  lesquels  il  est  venu  cercher  iusques  en  leurs  maisons,  ont  bien  dequoy  le  glorifier:  et  ceux  qui  sont  venus  de  pays  lointains,  et  qui  ont  este  ici  amassez  comme  en  un  trouppeau,  que  peuvent-ils  dire,  sinon  que  nostre  Seigneur  a  auiourd'huy  accompli  envers  eux  ce  qu'il  dit  par  son  prophete  Isaie,  c'est  qu'il  fera  trotter  par  le  monde  charrettes  et  chariots  pour  amener  de  tous  costez  peuples  pour  le  servir,  et  pour  l'adorer  en  son  Eglise?  Et  ainsi  donc,  quand  nous  ne  verrons  goutte  a  telles  choses,  il  est  certain  qu'il  n'y  aura  plus  d'excuse  ni  tergiversation  aucune,  que  nous  ne  pourrons  point  alleguer:  Ie  n'ay  point  pense  a  ces  choses,  d'autant  qu'elles  ne  m'ont  point  este  cogneues.  Car  Dieu  nous  les  monstre  assez  evidem-