46:819  819  HARMONIE  EVANGELIQUE.  820  Car  nous  leur  portons  envie,  et  concluons  de  ce  que  nous  voyons  auiourd'huy  a  l'oeil:  et  ne  pouvons  pas  eslever  nos  sens  pour  regarder  plus  loin.  Nostre  Seigneur  Iesus  Christ  donc  pour  remedier  a  ce  iugement  pervers  auquel  nous  sommes  par  trop  enclins,  nous  dit  que  si  nous  estimons  bienheureux  ceux  qui  rient,  ceux  qui  sont  saoulez,  et  qui  sont  riches,  c'est  d'autant  que  nous  ne  regardons  pas  l'issue,  que  nous  sommes  par  trop  legers,  comme  pour  nous  precipiter,  et  qu'avec  ceste  hastivete  si  grande,  nous  ne  pouvons  pas  donner  un  iugement  rassis.  Voyla  donc  comme  il  nous  tient  en  bride,  comme  par  ci  devant  il  a  dit,  Ne  pensez  point  que  vostre  condition  soit  mal-heureuse  quand  vous  pleurerez,  quand  vous  aurez  faim  et  soif,  mesme  que  vous  serez  pourchassez  et  persecutez:  ne  pensez  pas  que  Dieu  vous  ait  abandonnez  pourtant,  comme  si  vous  estiez  la  miserables  creatures.  Et  pourquoy?  Car  il  vous  faut  passer  outre  ce  monde,  et  chercher  vostre  loyer  au  ciel,  et  penser  que  c'est  d'estre  des  enfans  de  Dieu,  quand  il  se  "declarera  estre  vostre  Pere,  et  que  vous  le  reclamerez  pour  tel.  Quand  vous  aurez  cela  (di-ie)  vostre  estat  est  beaucoup  plus  desirable  que  tout  ce  que  les  hommes  appetent  yci  bas.  Aussi  maintenant  a  l'opposite,  vous  verrez  les  meschans  prosperer  et  fleurir,  vous  les  verrez  avoir  toutes  leurs  voluptez  et  delices,  et  y  estre  comme  plongez.  Voyla  ce  que  vous  verrez  auiourd'huy:  mais  ayez  patience.  Car  si  leur  ioye  est  convertie  en  grincement  de  dents,  si  leurs  richesses  leur  retournent  en  povrete,  d'autant  qu'elles  sont  maudites  de  Dieu,  si  l'honneur  qu'ils  ont,  est  pour  les  mettre  en  confusion  devant  Dieu  et  devant  ses  Anges,  si  tout  cela  est,  faut-il  que  vous  leur  en  portiez  envie?  En  somme,  nous  voyons  comme  nostre  Seigneur  Iesus  Christ  nous  veut  eslever  par  dessus  toutes  ces  choses  terrestres,  et  l'estat  de  ceste  vie  transitoire,  et  nous  monstrer  que  si  nous  n'avons  yci  nostre  loyer,  cela  ne  nous  doit  point  faire  perdre  courage,  d'autant  qu'il  est  au  ciel.  Or  en  disant  que  nostre  loyer  est  au  ciel,  il  n'entend  pas  quelque  recompense  que  nous  meritions  :  comme  les  Papistes  font  leurs  choux  gras  de  ces  mots,  toutesfois  et  quantes  que  ce  loyer  vient  en  avant.  Car  incontinent  ils  disent,  Ho,  il  s'ensuit  donc  que  nos  oeuvres  sont  meritoires  de  la  vie  eternelle,  et  que  quand  nous  avons  failli,  nous  avons  les  satisfactions  pour  nous  acquitter:  et  combien  que  la  grace  de  Dieu  nous  assiste,  si  est-ce  qu'il  y  a  quelque  dignite  en  nous,  quand  nous  besongnons  de  nostre  coste.  Et  combien  que  ceste  dignite-la  ne  soit  point  egale  a  ce  bien  infini  de  la  vie  eternelle,  si  est-ce  neantmoins  qu'il  y  a  quelque  condignite  et  convenance:  car  Dieu  seroit  iniuste,  sinon  qu'il  recompensast  ceux  qui  Font  servi.