46:818  Et  que  cependant  nous  soyons  tenus  comme  l'ordure  du  monde,  que  chacun  nous  reiette  et  mesprise,  que  mesme  on  nous  ait  en  detestation?  et  cependant  voyla  les  meschans  qui  se  sont  abandonnez  du  tout  a  mespris  de  Dieu,  a  mener  vie  dissolue,  comme  s'ils  vouloyent  renverser  tout  ordre,  ceux-la  neantmoins  sont  maintenus  et  favorisez,  ils  sont  les  bienvenus  par  tout.  Et  quand  ils  seront  nourris  delicatement,  et  qu'on  estimera  que  leur  vie  est  tant  heureuse  que  rien  plus,  il  nous  faudra  gemir  et  pleurer,  avoir  faim  et  soif,  cependant  que  ceux-ci  gourmanderont.  Voyla  donc  qui  pouvoit  encore  causer  un  regret  aux  disciples  de  nostre  Seigneur  Iesus  Christ,  comme  au  Pseaume  qu'on  a  chante  nous  voyons  ce  discours  bien  exprime:  car  David  confesse  que  son  pied  a  este  comme  sur  la  glace,  et  qu'il  ne  s'en  a  gueres  falu  qu'il  ne  soit  trebuscho  du  tout,  quand  il  a  regarde  les  meschans  estre  en  telle  prosperite,  qu'ils  estoyent  exemptez  de  toutes  les  miseres  communes  :  et  mesmes  que  quand  ils  ont  afflige  les  autres,  on  ne  les  a  pas  ose  regarder,  et  que  chacun  a  tremble  sous  eux.  Quand  donc  il  a  veu  cela,  il  proteste  que  c'estoit  pour  le  faire  desbaucher  du  tout,  si  Dieu  ne  l'eust  retenu:  mais  encores  ce  n'est  pas  que  du  premier  coup  ii  en  soit  venu  a  bout.  Car  il  confesse  qu'il  estoit  comme  une  beste,  qu'il  estoit  comme  un  asne,  ou  comme  un  veau,  qui  seroit  tellement  esgare  qu'on  ne  le  pourroit  tenir.  Ainsi  donc  nostre  Seigneur  Iesus  Christ  a  pourveu  a  toutes  ces  perplexitez  qui  nous  pourroyent  venir  en  fantasie.  Pour  ceste  cause  il  adiouste  Mal-heur,  mal-heur  sur  tous  ceux  qui  rient  auiourd'huy:  Malheur  sur  tous  ceux  qui  sont  bien  soulez:  Malheur  sur  tous  ceux  qui  sont  aimes  du  monde:  et  c'est  afin  que  nous  apprenions  d'attendre  l'issue,  et  ne  point  iuger  des  choses  par  un  seul  regard.  Car  la  felicite  qu'on  iuge  estre  en  tous  meschans,  n'est  qu'un  songe,  comme  ceste  vie  presente,  qu'est-ce  autre  chose  a  la  verite?  Mais  encore,  si  faut-il  que  les  meschans,  quand  Dieu  leur  donneroit  tous  leurs  aises  et  delices,  sentent  quelquesfois  en  ce  monde  des  amertumes  bien  grandes,  d'autant  que  Dieu  desia  les  advertit  que  le  bon  temps  ne  leur  durera  pas  tousiours.  Et  mesmes  il  fait  cela  aussi  pour  les  rendre  inexcusables,  afin  qu'ils  se  recognoissent,  et  qu'ils  se  disposent  a  rendre  comte:  et  quand  ils  auront  de  tels  advertissemens,  que  cela  soit  pour  aggraver  leur  condamnation  tant  plus.  Ainsi  quoy  qu'il  en  soit,  toutes  les  delices,  les  pompes,  les  voluptez,  les  honneurs,  les  richesses,  et  tous  les  biens  des  contempteurs  de  Dieu,  et  gens  profanes  ne  sont  qu'un  songe  qui  s'esvanouit  tantost.  Or  du  premier  coup  nous  ne  l'estimons  pas.  Et  voyla  qui  est  cause  de  nous  faire  avoir  desplaisir  et  tristesse,  quand  nous  les  voyons  prosperer.  52