46:816  devant  Dieu,  et  que  nous  ayons  tesmoignage  de  luy,  et  que  nostre  conscience  nous  responde  en  bien,  comme  sainct  Pierre  en  parle:  suyvant  aussi  ce  qui  est  dit  par  sainct  Paul  en  l'autre  passage,  c'est  que  nous  soyons  prests  de  mal  ouir,  c'est  a  dire  d'estre  blasmez,  mais  que  nous  ne  laissions  pas  de  bien  faire.  Soyons  donc  comme  criminels,  et  toutesfois  que  nous  cheminions  droictement,  et  que  Dieu  soit  telmoin  et  iuge  de  nostre  simplite:  et  cependant,  si  les  hommes  nous  chargent,  et  que  nous  soyons  comme  foulez  au  pied,  allons  tousiours  plus  outre,  afin  de  n'estre  point  occasion  de  scandale,  procurans  le  bien  :  cependant  ne  laissons  pas  d'estre  tousiours  prests  de  souffrir  telles  calomnies,  d'estre  condamnez  et  reiettez.  Et  comment?  Que  nous  soyons  la  comme  si  nous  estions  des  meschans,  comme  si  chacun  nous  devoit  courir  sus.  Voyla  donc  en  somme  ce  que  nous  avons  yci  a  retenir.  Or  nostre  Seigneur  Iesus  Christ  nous  propose  les  Prophetes,  il  les  a  proposez  a  ses  disciples:  et  maintenant  nous  avons  et  les  uns,  et  les  autres.  Car  si  les  persecutions  eussent  este  nouvelles,  et  que  c'eust  este  une  chose  auparavant  incognue,  d'estre  blasme  et  reiette  pour  avoir  purement  servi  a  Dieu:  il  est  certain  que  cela  eust  fort  esbranle,  voire  quasi  abbatu  les  plus  fermes.  Il  a  donc  falu  qu'on  cognust  que  ce  n'estoit  rien  de  nouveau  ni  d'estrange.  Et  voyla  pourquoy  nostre  Seigneur  Iesus  Christ  met  yci  en  avant  les  Prophetes:  comme  s'il  disoit  a  ses  disciples,  Vous  n'estes  pas  meilleurs  que  les  hommes  qui  ont  este  si  excellents,  qui  ont  este  douez  de  si  grandes  vertus,  que  Dieu  les  avoit  suscitez  comme  des  Anges  en  ce  monde.  Car  les  Prophetes  ont  represente  la  personne  de  Dieu:  il  leur  avoit  imprime  la  marque  de  sa  maieste,  en  sorte  qu'on  estoit  contraint  de  les  avoir  en  admiration.  Et  cependant  comment  les  a-on  traittez?  Ils  ont  endure  beaucoup  d'outrages  non  seulement  en  leurs  personnes,  mais  on  les  a  chargez  de  blasmes  et  d'iniures,  on  les  a  accusez  et  tenus  pour  mutins  et  ennemis  de  l'Eglise.  Comme  nous  lisons  de  Ieremie,  qu'on  luy  a  reproche  qu'il  ne  demandoit  que  semer  troubles  et  dissensions  entre  le  peuple,  qu'il  estoit  un  traistre,  et  avoit  intelligence  avec  les  ennemis.  Sur  cela  il  est  mis  en  prison,  et  luy  fait-on  les  plus  grands  outrages  du  monde.  Voyla  aussi  Isaie  qui  est  mis  a  mort,  d'une  facon  si  cruelle  que  rien  plus.  Les  uns  sont  fouettez,  les  autres  sont  comme  tirez  par  pieces.  Et  bien,  les-  Prophetes  ont  souffert  cela,  d'autant  que  Dieu  les  avoit  fortifiez.  Et  pourquoy  est-ce  que  vous  chercherez  maintenant  une  condition  meilleure?  Or  cest  exemple  yci  (comme  i'ay  dit)  a  beaucoup  servi  aux  disciples  de  nostre  Seigneur  Iesus  Christ,  afin  qu'ils  ne  flesehissent  point  quand  il  faudroit  estre  exercez  en  tels  combats,  quand  il  seroit  question  de  sous-