9:814  omnes  illic  exhiberi:  denique  vitam  aeternam  in  illo  cumulate  esse  revelatam.  Si  quidem  haec  est  vita  aeterna,  ut  agnoscant  te  verum  Deum  et  Iesum  Christum  quem  misisti:  in  quo  sunt  singulae  salutis  nostrae  partes  repositae.  Hic  noster  Isaacus  oblatus  in  sacrificium,  ut  potestati  mortis  non  succubuerit.  Hic  Iacobus  ille  vigilantissimus,  nunquam  non  in  gregis  sibi  commissi  salutem  intentus.  Hic  Iosephus  ille,  pius  frater  ac  misericors,  in  summa  sua  dignitate  indignissimos  atque  abiectissimos  fratres  non  dedignatus.  Hic  Melkizedek  summus  sacerdos  unico  aeterno  sacrificio  perfunctus  semel,  quo  simul  universis  finem  imponeret.  Hic  Moses  summus  legislator,  legis  ipsius  in  cordis  tabulis  inscribendae  singularis  autor.  Hic  Iosua  fidus  deductor,  qui  suos  in  promissam  haereditatem  intulit.  Hic  David  inclytus  ac  semper  invictus,  potestatem  omnem  adversariorum  perfregit  atque  subiecit  sibi.  Hic  Solomo  splendidus  triumphator  populum  in  pace  prosperrima  gubernavit.  Hic  Samson  fortissimus,  in  media  morte  infensissimos  illos  ac  numerosissimos  hostes  semel  prostravit.  Denique  quidquid  salutare  hominibus  aut  cogitando  assequi,  aut  ex  voto  proferre  possis,  totum  illud  in  Christo  obvium  est,  ac  re  ipsa  constat.  Christus  humiliatus  est  ut  nos  attolleret,  servituti  subiectus  ut  in  libertatem  assereret,  pauper  factus  ut  ditaret,  venditus  ut  redimeret,  captus  ut  liberaret,  damnatus  ut  absolveret,  factus  maledictio  in  nostram  benedictionem,  oblatio  pro  peccato  ad  nostram  iustitiam,  deformatus  ut  reformaret,  mortuus  ut  vivificaret.  Per  Christum  nempe  distorta  omnia  complanantur,  atque  inaudita  rerum  omnium  transformatio  producitur.  Per  Christum,  etiam  emollita  durities,  placata  ira,  illustratae  tenebrae,  iustificata  iniustitia,  roborata  infirmitas,  erecta  desolatio,  occupatum  peccatum,  calcatus  contemptus,  confidens  trepidatio,  inductum  debitum,  levatus  labor,  recreatus  moeror,  fortunatum  infortunium,  explicata  perplexa,  ordinata  confusa,  scissio  resarta,  ignobilitas  nobilitata,  contumacia  pervicta,  comminatio  perterrefacta,  retectae  insidiae,  insultus  invasi,  vim  vis  patitur,  pugna  impugnatur,  praelium  impetitur,  ultio  vindicatur,  tormentum  torquetur,  damnatio  damnatur,  abyssus  absorbetur,  infernus  deprimitur,  mors  emoritur,  mortalitas  immortalitate  commutatur.  Uno  verbo  per  Christum  misericordia  miseriam  sustulit,  bonitas  infelicitatem  exhausit.  Et  quae  tela  erant  diaboli  ad  nos  invadendos,  qui  ad  pungendos  aculei,  illa  eadem  exercitamenta  iam  supersunt,  ex  quibus  fructum  insignem  percipiamus.  Nunc,  inquam,  gloriari  cum  apostolo  ita  audemus:  Ubinam  o  inferne  tua  victoria?  ubinam  o  mors  aculeus  tuus?  Nunc  per  Christi  spiritum,  quem  promisit  suis,  non