9:813  813  PRAEFATIONES.  814  thresors  de  paradis  vous  y  sont  ouvertz,  et  les  richesses  de  Dieu  desployees,  et  la  vie  eternelle  revelee.  Car  ceste  est  la  vie  eternelle,  congnoistre  ung  seul  vray  Dieu,  et  celuy  qu'il  a  envoye  Iesus  Christ,  auquel  il  a  constitue  le  commencement,  le  moyen  et  la  fin  de  nostre  salut.  Cestuy  est  Izahak  le  filz  bienayme  du  pere  qui  a  este  offert  en  sacrifice,  et  toutesfois  n'a  point  succombe  a,  la  puissance  de  la  mort.  C'est  le  vigilant  pasteur  Iakob,  ayant  si  grand  soing  des  brebis  qu'il  a  en  garde.  C'est  le  bon  et  pitoyable  frere  Ioseph,  qui  en  sa  gloire  n'a  point  eu  honte  de  recongnoistre  ses  freres,  quelque  humbles  et  abiectz  qu'ilz  feussent.  Cest  le  grand  sacrificateur  et  evesque  Melchi-zedek  ayant  faict  sacrifice  eternel  une  fois  pour  toutes.  C'est  le  souverain  legislateur  Moseh  escrivant  sa  loy  es  tables  de  noz  coeurs  par  son  esperit.  C'est  le  fidele  capitaine  et  guide  Iehosua  pour  nous  conduire  en  la  terre  promise.  C'est  le  noble  et  victorieux  Uoy  David  assubiectissant  a  sa  main  toute  puissance  rebelle.  C'est  lo  magnificque  et  triumphant  Roy  Salomon,  gouvernant  son  regne  en  paix  et  prosperite.  C'est  le  fort  et  vertueux  Samson  qui  par  sa  mort  a  acable  tous  ses  ennemys.  Et  mesme  tout  ce  qui  se  pourroit  penser  ou  desirer  de  bien  est  trouve  en  ce  seul  Iesus  Christ.  Car  il  s'est  humilie  pour  nous  exalter,  il  s'est  asservy  pour  nous  affranchir,  il  s'est  apaovry  pour  nous  enrichir,  il  a  este  vendu  pour  nous  racheter,  captif  pour  nous  delivrer,  condamne  pour  nous  absouldre,  il  a  este  faict  malediction  pour  nostre  benediction,  oblation  de  peche  pour  nostre  iustice,  il  a  este  desfigure  pour  nous  figurer,  il  est  mort  pour  nostre  vie.  Tellement  que  par  luy  rudesse  est  adoulcie,  courroux  appaise,  tenebres  esclaircies,  iniustice  iustifiee,  foiblesse  vertueuse,  desconfort  console,  peche  empesche,  mespris  mesprise,  crainte  asseuree,  debte  quictee,  labeur  allege,  tristesse  resiouye,  malheur  bienheure,  difficulte  facile,  desordre  ordonne,  division  unie,  ignominie  anoblie,  rebellion  assubiectie,  menace  menacee,  embusches  desbuschees,  assaulx  assaillis,  effort  efforce,  combat  combatu,  guerre  guerroyee,  vengeance  vengee,  torment  tormente,  damnation  damnee,  abysme  abysme,  enfer  enserre,  mort  morte,  mortalite  immortelle.  Bref  misericorde  a  englouty  toute  misere,  et  bonte  toute  malheurete.  Car  toutes  ces  choses  qui  soloient  estre  armes  du  diable  pour  nous  combatre  et  aguillon  de  la  mort  pour  nous  poindre,  nous  sont  tournez  en  exercice  desquelz  nous  povons  faire  nostre  profit.  Si  que  nous  nous  povons  glorifier  avec  L'apostre,  disans:  O  enfer  ou  est  ta  victoire?  o  mort  ou  est  ton  aguillon?  Dont  est  faict  que  par  ung  tel  esperit  de  Christ  promis  a  ses  esleuz,  ne  vivons  plus,  mais  Christ  en  nous,  et  sommes  par  esprit  assis  entre  les  celestes,  entant  que  le  monde