9:812  pere  vitam  potest,  quae  per  illam  etiam  unice  erat  expetenda.  Des  modo  Christum  praesentem,  et  quidquid  maledictissimum  haberi  potest,  summae  benedictioni  cedet,  quidquid  exsecratissimum  sanctificationi,  quidquid  funestissimum  summo  bono.  Ut  igitur  universae  mundi  vires  nobis  insultent,  stet  nobis  mens  oportet.  Neque  enim  excidere  potest  illa  promissio:  Dominus  ex  alto  subsannabit  eos.  Convenite  et  conspirate  et  non  erit.  Sic  autem  a  Tertulliano  apposite  traditum  est  iam  olim,  sanguinem  martyrum  semen  esse  ecclesiae.  Neque  deest  etiam  nobis  certissima  illa  consolatio,  quod  oculis  a  mundo  et  rebus  praesentibus  ad  Dei  tribunal  conversis,  illud  ipsum  patienter  exspectamus,  quo  demum  exstante  momento  corruet  totus  ille  paratus  impiorum,  et  quidquid  tanto  opere  adversus  tremendum  iudicem  sibi  moliti  sunt,  dicto  citius  evanescet.  Hoc  autem  exstabit,  quum  regnum  Dei,  quod  spe  tantum  iam  percipimus,  re  ipsa  tandem  revelabitur,  quum  Dominus  Iesus  Christus  cum  angelis  maiestatis  suae  visendus  apparebit,  quum  universi  sigillatim  ad  illius  magni  regis  forum  et  cognitionem  sua  illa  die  sistentur.  Atque  tum  demum  qui  constanter  in  hoc  foedere  perstiterint,  et  ad  patris  coelestis  voluntatem  rebus  omnibus  insuperhabitis  attenti  fuerint,  collocabuntur  ad  dexteram,  percipient  scopum  fidei,  benedictionem  cum  vita  aeterna  coniunctam.  Quemadmodum  ipsos  non  puduerit  Christum  agnovisse,  et  confessum  esse,  dum  in  hominum  opprobrio  et  contemptu  iaceret:  ita  etiam  gloriae  ipsius  tum  revelatae  fient  participes  ,  aeternamque  per  illum  coronam  percipient.  Contra  impii,  praefracti,  reprobi,  ac  contempti  evangelii  rei,  qui  item  ut  locum  suum  ac  dignitatem  retinerent,  cum  Christo  humiliari  atque  deiici  non  sustinuerint,  qui  in  metu  hominum  sepulti  a  timore  Dei  defecerint,  ut  et  spurii  et  illegitimi  ac  tanto  parente  indigni  statuentur  ad  laevam,  in  maledictionem  pessum  dabuntur,  ac  pro  infidelitatis  mercede  poenis  aeternis  addicti  conflagrabunt.  Quare  ubi  audimus  evangelio  nobis  Christum  offerri,  in  quo  omnes  Dei  promissiones  sint  Etiam  et  Amen  :  uti  Christus  ipse  illic  significat  se  a  patre  missum  esse,  versatum  cum  hominibus,  perfecisse  quidquid  ad  nostram  salutem  opus  esset,  uti  hoc  totum  in  lege  et  prophetis  comprehensum  ante  exstabat,  illud  dubitandum  non  est,  patere  etiam  per  illum  nobis  coeli  thesauros,  Dei  ipsius  inquam  divitias