9:804  Atque  huic  volumini  inditum  est  Novi  Foederis  seu  Testamenti  nomen,  ratione  veteris  illius,  quod  nempe  cum  novo  coalescere  oporteret,  et  in  illo  impleri.  Nam  et  in  sese  infirmum  erat  vetus  illud  et  minus  perfectum,  unde  et  abrogatum  est  novo  adveniente,  et  abolitum.  At  vero  novum  istud  aeternum  est,  quod  nunquam  aut  consenescat,  aut  deficiat,  quum  illius  mediator  Christus  sit,  qui  sua  morte  illud  sancivit,  atque  irrefixum  constituit,  quum  per  illam  attulit  summam  ac  perfectam  expiationem  omnium  praevaricationum,  quae  sub  veteri  foedere  remanebant.  Huic  foederi  Evangelii  nomen  etiam  adscribitur,  quod  bonum  et  felicem  illum  nuncium  significat  :  quia  nempe  ostendit  Christum,  filium  Dei  vivi  unicum  atque  aeternum,  hominem  factum  esse,  ut  per  ipsum  filii  Dei  adoptione  efficeremur.  Ac  proinde  unus  hic  ille  servator  nobis  statuitur,  in  quo  uno  sita  est  nostra  omnis  redemptio,  pax,  iustitia,  sanctificatio,  salus,  vita:  qui  mortuus  est  propter  peccata  nostra,  resurrexit  propter  iustificationem  nostram:  qui  in  coelum  ascendit,  ut  illuc  aditum  nobis  patefaceret,  ac  nostro  nomine  haereditatem  cerneret:  qui  se  perpetuo  coram  patre  nobis  advocatum  sisteret  ac  sacerdotem  exhiberet:  qui  ut  rex,  dominus  ac  summus  herus  designatus  ad  dexteram  patris  laederet,  ut  semel  universa  tum  in  coelo  tum  in  terra  in  suum  ordinem  ac  statum  reponeret.  Hoc  vero  penes  nullum  unquam  angelorum,  patriarcharum,  prophetarum,  apostolorum  fuit,  neque  ullus  ex  ipsis  ad  tantum  munus  destinatus  fuit.  Atque  ut  venturi  Christi  in  veteri  foedere  apud  prophetas  sparsa  exstabant  testimonia  quam  plurima  :  ita  etiam  Dominus  Iesus  manifestis  indiciis  atque  indubitatis  argumentis  ecclesiae  sese  exhibens,  is  ipse  Christus  esse  demonstratus  est.  Siquidem  Dominus  Deus,  tum  vocem  suam,  tum  spiritus  sancti,  tum  angelorum,  prophetarum,  apostolorum,  adeoque  omnium  rerum  conditarum  in  testimonium  filio  suo  adhibuit,  ut  iam  repugnandi  locus  non  esset,  nisi  quis  sponte  Dei  veritati  obsistere  auderet.  Exstat  enim  coeleste  illud  ac  solenne  oraculum  omni  exceptione  maius  :  Hic  est  filius  meus  dilectus,  in  quo  acquievi,  ipsum  audite.  Spiritus  sanctus  vero  in  nostris  cordibus  testis  est  veritatis  Christi  locupletissimus,  uti  passim  inculcat  apostolus.  Angeli  vero  etiam  non  semel.  Sic  enim  Gabriel  angelus  ad  virginem  matrem  futuram:  Ecce  concipies  in  utero  et  paries  filium,  et  vocabis  nomen  eius  Iesum.  Ipse  enim  erit  magnus  et  filius  altissimi  vocabitur,  et  dabit  illi  Dominus  sedem  David  patris  sui,  et  regnabit  in  domo  Iacob  in  aeternum,  et  regni  eius  non  erit  finis.  Idem  prorsus  ab  angelo  Iosephus  Mariae  sponsus  accepit.  Idem  ab  angelo  denunciante  audierunt  pastores:  natum  ipsis  servatorem,  qui  est,  inquit,  Christus  Dominus.  Cui