45:80  pastores  divinum  opus  certo  agnoverint.  Ardor  autem  glorificandi  Dei,  qui  in  illis  laudatur,  tacita  quaedam  est  pigritiae  nostrae  vel  potius  ingratitudinis  exprobratio.  Nam  si  tantum  apud  eos  valuerunt  Christi  incunabula,  ut  ex  stabulo  et  praesepi  in  coelum  usque  conscenderent,  quanto  efficacior  apud  nos  esse  debet  mors  et  resurrectio  Christi,  ut  ad  Deum  evehamur?  Neque  enim  tantum  sublatus  est  Christus  a  terra,  ut  omnia  traheret  post  se  ipsum,  sed  ad  dexteram  patris  sedet,  ut  in  mundo  peregrinantes  coelestem  vitam  toto  corde  meditemur.  Caeterum  veram  pietatis  naturam  designat  Lucas,  quum  dicit  angeli  testimonium  pastoribus  instar  regulae  fuisse,  ad  quam  omnia  exigerent.  Tunc  enim  rite  adiuvatur  fides  Dei  operibus,  si  omnia  in  scopum  illum  dirigit,  ut  Dei  veritas,  quae  in  verbo  patefacta  est,  clarius  illuceat.  21.  Ut  circumcideretur  puer.  Quod  de  circumcisione  in  genere  tenendum  est,  petant  lectores  ex  Geneseos  cap.  17,  10.  Nunc  quae  Christi  personae  conveniunt,  breviter  attingere  sufficiet.  Voluit  Dens  filium  suum  circumcidi,  ut  legi  subiiceret:  nam  circumcisio  solenne  symbolum  erat,  quo  in  legis  observationem  initiabantur  Iudaei.  Finem  declarat  Paulus  ad  Galatas  cap.  4,  4,  quum  dicit,  factum  esse  sub  lege,  ut  eos  qui  sub  lege  erant  redimeret.  Christus  ergo  suscepta  circumcisione  servum  legis  se  professus  est,  ut  nobis  libertatem  acquireret.  Atque  hoc  modo  non  tantum  legis  servitus  abolita  ab  ipso  fuit,  sed  ad  solidum  suum  corpus  applicita  fuit  umbra  caeremoniae,  ut  mox  finem  acciperet.  Etsi  enim  eius  abrogatio  ex  morte  Christi  et  resurrectione  pendet,  fuit  tamen  quoddam  eius  praeludium,  quod  passus  est  circumcidi  filius  Dei.  Nomen  eius  Iesus.  Testatur  etiam  hic  locus,  receptum  fuisse  apud  Iudaeos  morem,  ut  die  circumcisionis  nomina  liberis  suis  inderent,  sicut  hodie  in  baptismo  solemus.  Duo  autem  notat  evangelista:  non  temere,  neque  hominum  arbitrio  nomen  Iesu  fuissejfilio  Dei  impositum,  sed  quod  angelus  e  coelo  attulerat:  deinde  Ioseph  et  Mariam  paruisse  Dei  imperio.  Atque  hic  est  fidei  nostrae  cum  Dei  verbo  consensus,  ut  eo  praeeunte  loquamur  ipsi,  et  eius  promissionibus  fides  nostra  respondeat.  Praesertim  ordinem  verbi  praedicandi  commendat  nobis  Lucas,  quum  dicit,  voce  hominum  testatam  fuisse  salutem  ex  Christi  gratia,  quae  divinitus  per  angelum  promissa  fuerat.  MATTH.  II.  1.  Quum  autem  natus  esset  Iesus  in  Bethlehem  Iudaeae  temporibus  Herodis  regis,  ecce  magi  ab  oriente  venerunt  Hierosolymam^  2.  Dicentes:  Ubi  est,  qui  natus  est  rex  Iudaeorum?  vidimus  enim  illius  stellam  in  oriente,  et  venimus^  ut  adoremus  eum.  3.  Auditis  autem  his  Herodes  rex  turbatus  est,  et