44:80  CAPUT  I.  1.  Anno  secundo  Darii  regis,  mense  sexto,  die  primo  mensis  datus  fuit  sermo  Iehovae  in  manum  Chaggai  prophetae  ad  Zerubbabel  filium  Sealtiel  ducem  Iehudah  et  ad  Iehosuah  filium  Iehosadah  sacerdotem  magnum,  dicendo:  Hic  designat  propheta  et  annum  et  mensem  et  diem,  quo  coepit  pigritiem  vel  ignaviam  populi  mandato  Dei  coarguere:  quia  scilicet  quisque  studebat  domesticis  suis  rationibus,  interea  nulla  erat  templi  aedificandi  ratio.  Dicit  igitur  hoc  factum  esse  anno  secundo  Darii  regis.  Variant  interpretes  in  tempore  :  quia  inter  ipsos  non  satis  convenit  a  quo  die,  vel  anno  captivitas  babylonica  inceperit:  quia  volunt  quidam  exordium  70  annorum  sumi  a  clade,  quae  sub  Iechonia  contigit  ante  urbis  vastationem  et  ruinam  templi.  Tamen  probabile  est,  fluxisse  multum  temporis  antequam  coeperit  munus  propheticum  aggredi  Haggaeus:  quia  Babylon  capta  fuit  viginti  annis,  aut  paulo  plus  ante  mortem  regis  Cyri:  successit  filius  Cambyses,  qui  regnavit  octo  annis.  Tertius  fuit  Darius  filius  Hystaspis,  quem  Iudaei  volunt  esse  filium  Assueri  ex  Hester:  sed  commentis  eorum  nulla  est  adhibenda  fides,  quia  tantum  impudentia  valent  ubi  agitur  de  rebus  incognitis.  Volunt  enim  asserere  quidquid  venit  illis  vel  in  cerebrum  vel  in  buccam:  et  ita  fabulantur  sine  aliquo  colore  ut  plurimum.  Sufficiat  nobis  tenere,  hunc  esse  Darium  filium  Hystaspis,  qui  successit  Cambysi  (nam  septem  menses  magorum  omitto,  quia  sicuti  fallacia  obrepserant,  ita  paulo  post  deleti  sunt:)  ac  probabile  est  Cambysem,  qui  primogenitus  fuit  Cyri  filius,  caruisse  masculo  haerede.  Unde  factum  est,  ut  occiso  eius  fratre  procerum  consensu,  regnum  ad  hunc  Darium  pervenerit.  Fuisse  igitur  hunc  tertium  Persarum  regem  colligere  licet  ex  historiis.  Daniel  quinto  capite  dicit  urbem  Babel  captam