30:80  Deus  non  laxavit  habenas  populo  ut  crudelius  et  immanius  saeviret  in  hostes,  et  malum  malo  pensaret:  sed  tamen  hanc  illi  vindictam  commisit,  ut  cuivis  appareat  quam  ecclesiae  salus  sit  ipsi  cara  et  pretiosa.  Quare  non  debet  nobis  insolens  videri  haec  Dei  sententia  de  Amalecitis  perdendis  et  internecione  una  delendis.  Sed  alia  hic  oritur  quaestio,  quomodo  Deus  post  tam  longum  temporis  intervallum  Amalecitas  una  internecione,  et  quidem  ipsas  mulieres  cum  infantibus  deleri  iubeat.  Nam  primum  nullus  dum  eorum  qui  tum  vivebant  natus  erat,  quum  in  itinere  populus  Israeliticus  impetum  illorum  sustinuit:  sed  contra  qui  adversus  Deum  et  ecclesiam  ipsius  ausi  tum  impetum  facere  fuerant,  partim  occubuerant,  partim  fuga  sibi  salutem  quaesiverant.  Et  quidquid  sit  conspirationis  istius  autores  puniri  amplius  non  poterant:  ac  proinde  iam  internecione  deleri  iubentur  qui  nondum  tum  temporis  in  vivis  erant.  Sed  quid  de  mulieribus  dicemus,  quibus  plerumque  in  bello  parci  solet:  quid  de  infantibus  adhuc  a  matrum  uberibus  pendentibus?  Nam  nominatim  pueros  lactantes  interfici  iubere  hoc  loco  Dominum  videmus.  Sane  nullum  hic  teneri  modum  forte  quis  dixerit,  et  summam  istam  esse  crudelitatem  et  inauditam  immanitatem.  Sed  tanto  magis  hac  in  parte  nobis  cavendum  est,  et  nostrae  curiositati  habenae  iniiciendae,  ne  in  Dei  iudicia  curiosius  inquiramus.  Nam  quae  esset,  obsecro,  dementia,  Dei  iudicia  et  facta  nostrae  opinioni  et  imaginationi  subiicere,  et  de  ipsius  iudiciis  ex  nostro  sensu  ferre  sententiam  ?  Nae  Dei  sapientia  est  immutabilis:  quemadmodum  et  immota  ipsius  veritas,  virtus  et  iustitia:  quae  omnia  sunt  nobis  incomprehensibilia  :  quis  ergo  furor  esset  ad  nostrum  captum  et  mensuram  illa  velle  exigere?  Profecto  non  secus  faciunt  istiusmodi  homines,  quam  si  se  lunam  dentibus  velle  apprehendere  iactarent,  quod  summae  esset  insaniae  testimonium.  Quantus  enim  furor  esset  solem  ipsum  velle  pallio  vel  manica  comprehendere?  Atqui  Deum  suis  sensibus  subiicientes,  et  eius  facta  ad  sui  captus  normam  exigentes,  non  aliud  faciunt  quam  si  montes  omnes,  coelumque  ac  terram  ipsam  manu  sua  comprehendere  conarentur.  Quod  si  quis  aggrediatur,  annon  merito  furiosus  et  insanus  habebitur?  Quamobrem  eo  maiore  studio  enitendum,  ut  intra  modestiae  terminos  contineamur:  ut  cum  omni  sobrietate  et  reverentia  Dei  iudicia  quae  longe  nostrum  captum  superant  adoremus  et  veneremur.  Verum  quoniam  importuni  quidam  homines  diabolica  quadam  arrogantia  adversus  Deum  insurgunt,  et  veluti  cornua  tollunt,  agedum  ut  os  illis  occludatur  et  plane  contundantur,  divina  ista  iudicia  ex  quadam  similitudine  ab  hominibus  ducta  expendamus.  Si  quis  nocentem  hominem  caedi  tamen  nolit,  neque  ad  mortem  rapi,  etiamsi  a  iudice  sit  capitali  supplicio  addictus,  nonne