54:8  8  vertu  en  eux,  par  laquelle  Dieu  leur  fust  oblige.  Sainct  Paul  au  contraire,  quand  il  se  nomme  apostre,  ne  dresse  point  la  creste  pour  dire  qu'il  s'y  soit  avance,  mais  il  remet  le  tout  a  la  bonne  volonte  de  Dieu  et  a  son  plaisir:  comme  s'il  disoit  qu'il  n'est  point  question  d'enquerir  s'il  a  este  meilleur  que  d'autres,  ou  plus  idoine.  Il  est  vray  que  cela  y  estoit,  d'autant  que  Dieu  l'avoit  forme:  mais  cependant  il  se  demet  de  ce  que  les  hommes  ont  accoustume  d'attirer  a.  eux.  Sainct  Paul  doncques  confesse  qu'il  n'est  point  apostre  pource  qu'il  l'avoit  desservi,  mais  d'autant  que  le  plaisir  de  Dieu  est  tel.  Et  en  cela  voit-on  (suivant  la  doctrine  laquelle  est  par  tous  ses  escrits)  comme  il  ne  laisse  rien  aux  hommes  dequoy  ils  se  puissent  glorifier,  mais  veut  que  Dieu  apparoisse  en  tout  et  par  tout.  Or  il  y  a  puis  apres  un  mot  adiouste  qui  emporte  beaucoup:  De  la  promesse  de  vie  qui  est  en  Iesus  Christ.  En  quoy  sainct  Paul  monstre  que  les  apostres  n'ont  point  este  creez  pour  estre  comme  chiens  muets,  ou  des  idoles,  mais  pour  anoncer  la  doctrine  de  salut,  et  en  estre  tesmoins.  Ie  di  que  ce  poinct  emporte  beaucoup.  Car  nous  voyons  que  le  pape  avec  ses  bestes  cornues  n'ont  point  honte  de  s'appeller  successeurs  des  apostres:  et  cependant  si  on  les  veut  attirer  en  chaire  pour  exercer  cest  office,  cela  derogue  a  la  dignite  Episcopale,  voire  ce  leur  semble.  Or  sainct  Paul  monstre  ici  qu'il  n'y  a  nulle  dignite  de  prelat  ni  d'Evesque,  ne  de  pasteur,  sinon  pour  porter  et  anoncer  l'Evangile.  Tous  ceux  doncques  qui  voudront  avoir  quelque  preeminence  en  l'Eglise,  il  faut  qu'ils  cognoissent  que  c'est  a  ceste  charge  que  Dieu  les  a  establis,  qu'ils  proposent  la  doctrine  de  salut.  Et  ainsi  que  le  pape  se  vante  tant  qu'il  voudra  de  sa  Hierarchie,  et  qu'il  dise  que  tous  ces  marmousets-la,  c'est  a  dire  ces  Evesques  qui  se  tienent  la,  representent  l'Eglise,  il  ne  faut  que  ce  mot  de  sainct  Paul  pour  monstrer  leur  impudence,  et  pour  leur  arracher  ce  masque  duquel  ils  se  couvrent.  Car  s'ils  nous  anoncoyent  la  verite  de  Dieu,  et  qu'ils  nous  fussent  tesmoins  de  nostre  salut,  il  ne  faudroit  point  contredire  a*  ce  qu'ils  alleguent.  Mais  cependant  qu'ils  pervertissent  tout  ordre,  voire  d'autant  qu'il  ne  leur  chaut  d'exercer  cest  office  que  Dieu  leur  a  commis,  et  mesmes  s'en  moquent,  il  leur  semble  que  cela  ne  leur  soit  point  decent,  et  qu'il  ne  conviene  point  a  leur  estat.  Il  ne  faut  point  user  de  longue  dispute:  car  s'ils  sont  Evesques,  il  faut  qu'ils  ayent  la  bouche  ouverte  pour  prescher.  Toutesfois  encores  n'est-ce  pas  assez  que  les  hommes  facent  office  de  prescheurs,  mais  il  faut  qu'ils  soyent  vrais  messagers  de  Dieu,  et  qu'ils  ne  mettent  point  en  avant  leurs  songes  et  resveries,  mais  ce  qu'ils  auront  receu,  qu'ils  le  dispensent  fidelement  sans  y  rien  adiouster.