28:8  8  brigandages  souventesfois,  qu'il  n'est  question  que  d'escorcher  les  uns  les  autres.  Malheur  sur  nous  donc,  si  nous  ne  pensons  mieux  a  ce  qui  nous  est  ici  remonstre:  c'est  que  Dieu  nous  oblige  a  procurer  le  bien  d'autruy:  et  que  nous  advisions  de  tellement  faire,  que  nul  ne  porte  dommage  p|r  sa  faute:  et  non  seulement  que  nous  soyons  purs  de  toute  malice,  mais  aussi  de  nonchalance.  Car  Dieu  nous  amene  iusques  la,  que  tout  ainsi  que  nous  pensons  a  nostre  profit,  qu'il  ne  faut  point  aussi  mettre  en  oubli  le  bien  de  nos  prochains:  comme  nous  voulons  qu'on  veille  sur  nous,  en  cas  que  nous  eussions  perdu  quelque  chose,  que  nous  rendions  la  pareille  a  tous  ceux  a  qui  nous  pourrons  secourir  en  necessite.  Or  maintenant  s'il  est  dit  que  nous  devons  ramener  ou  l'asne,  ou  le  boeuf  de  nostre  prochain,  que  sera-ce  de  sa  personne  propre?  ou  bien  que  sera-ce  de  ses  enfans  et  de  sa  famille?  Ie  verray  quelque  maison  desbauchee,  ie  verray  que  le  maistre  est  trompe  :  si  ie  ne  l'adverti,  ie  suis  coupable.  Et  ainsi  donc  il  nous  faut  venir  par  degrez  iusques  la,  que  si  nous  devons  avoir  le  soin  des  bestes,  comment  ne  l'aurons-nous  des  creatures  humaines?  Si  ie  doy  ramener  le  boeuf  d'un  homme,  quand  ie  l'auray  trouve  errant,  de  peur  qu'il  ne  se  perde:  et  que  sera-ce  si  ie  voy  que  ses  enfans  perissent,  et  qu'ils  soyent  comme  bestes  esgarees,  ne  penseray-ie  point  de  les  ramener  au  bon  chemin?  Et  puis  en  general,  si  ie  voy  mon  prochain  aller  en  ruine  et  perdition,  quant  a  sa  personne,  il  faut  que  ie  le  reduise:  comme  aussi  S.  Iaques  nous  exhorte:  Si  quelcun  de  vous  a  reduit  son  prochain  a  la  bonne  voye,  quand  il  est  errant,  il  a  gagne  une  ame  a  Dieu.  Or  si  nostre  Seigneur  exerce  sa  charite  iusques  aux  boeufs  et  aux  asnes,  que  sera-ce  de  ceux  qu'il  a  creez  a.  son  image,  et  qui  sont  semblables  a  nous,  et  avec  lesquels  nous  avons  fraternite,  non  seulement  quant  a  leurs  corps,  mais  quant  a  leurs  ames?  Nous  verrons  qu'ils  s'en  vont  perir,  et  qu'ils  sont  esgarez:  nous  ne  leur  tendrons  point  la  main,  nous  ne  ferons  point  nostre  devoir  de  les  ramener  en  train  de  salut.  Apprenons  donc  de  gagner  les  ames,  quand  nous  les  verrons  perdues,  ou  qu'elles  en  seront  en  danger:  et  appliquons-nous  a  cela  tant  qu'il  nous  sera  possible.  Car  si  nous  y  sommes  lasches,  il  ne  faudra  point  d'autres  tesmoins  que  les  bestes  brutes.  Car  si  nous  les  avons  laisse  perir  a  leurs  maistres,  nous  serons  condamnez  devant  Dieu.  Il  faudra  donc  que  nostre  procez  nous  soit  fait  et  forme  par  les  bestes,  quand  nous  aurons  ainsi  mesprise  de  ramener  les  povres  creatures  qui  estoyent  errantes,  et  faire  qu'elles  fussent  rendues  a  Dieu.  Car  si  nous  sommes  obligez  envers  les  hommes  mortels  de  leur  maintenir  leur  droict,  ie  vous  prie,  ne  sommes-nous  point  plus  tenus  a  Dieu