9:790  plus  satis  esse  odiosam:  quia  multi  sunt  ventres  qui  non  nisi  glande  pasci  sustinerent,  etiam  reperta  fruge.  Sed  ea  demum  novitas  odium  meretur,  quam  nullo  operae  pretio  affectatam  esse  data  opera,  atque  ascitam  constat:  quae  vero  sepultam  veritatem  eruit,  eam  non  omni  favore  amplecti,  turpissima  ingratitudo  est.  Quod  si  ea  est  hominum  barbaries,  ut  beneficiis  etiam  ipsis  male  afficiantur,  omittendae  potius  offensiones  sunt  et  quaevis  odia,  quam  ut  eorum  gratia  veritatis  dispendio  constet.  Quamquam  de  populo  securus  sum,  qui  iampridem  famelicus  talibus  epulis  inhiat,  tantum  abest  ut  a  novitate  abhorreat.  Sed  hunc  suae  malignitati  praetextum  quaerunt,  quibus  non  satis  est  in  confertissimis  thesauris  volutari,  nisi  nummulos  de  meliore  nota  percussos  populo  invideant,  salvis  etiam  et  integris  suis  thesauris.  De  interprete  parcius  loquor,  ne  quid  cognationi  quae  illi  mecum  intercedit,  aut  veteri  nostrae  familiaritati  dare  videar.  Dicam  tamen  (quod  et  ipse  mea  fide  polliceri  ausim,  nec  livor  ipse  infitiari  possit)  hominem  nec  ingenio  tardum,  nec  eruditionis  inopem,  quantum  industria  studio  sedulitate  adniti  potuit,  summa  fide  in  hoc  interpretandi  officio  versatum  esse.  Neque  tamen  quaedam  esse  dubito,  quae  vel  pro  iudiciorum  varietate,  vel  quia  opere  in  longo  interdum  somnus  irrepit,  non  omnibus  placitura  sint.  Verum  lectores  hortor,  ut  si  qua  eius  generis  occurrant,  ne  hominem  de  sacris  literis  bene  meritum  mordere,  proscindere  et  insectari  malint,  quam  modeste  sui  lapsus  admonere.  Haec  ingenuitas  et  christianam  pietatem,  et  liberalem  doctrinam  decet:  nec  pessimam  gratiam  a  Roberto  nostro  referent,  qui  multis  aliis  dotibus  eximius  modestia  tamen  se  ipsum  vincit  :  si  tamen  ea  est  modestia  ac  non  potius  immodicus  pudor,  quo  paene  ab  hoc  tam  sancto  labore  suscipiendo  abstractus  est,  nisi  hortatu  ac  etiam  flagitatione  sua  victum  sancti  viri  invictique  verbi  testes  Chusemeth  et  Chlorotes  1)  tandem  manus  dare  coegissent.  Qui  vero  nulla  ratione  ab  improbitate  linguae  cohiberi  possunt,  ii  meminerint  facillimam  esse  maledicendi  artem,  si  quis  ea  certare  velit:  et  quam  mulierculae  in  triviis  melius  exerceant,  quam  in  scholis  rhetores.  Neque  vero  Comicum  illud  minor,  male  vicissim  audituros  pro  sua  maledicentia.  Habent  hominem  quem  impune  lacessant,  quantum  ad  procacitatis  vices  attinet.  Sed  ne  magnam  virulentae  huius  facundiae  laudem  exspectent,  moneo.  Tam  verum  est  illud  quam  vulgatum,  cavillari  omnia  promptum  esse,  sed  non  item  aemulari.  Valete.  1)  Sub  his  nominibus  Farellum  (t  Viretum  latere  et  per  se  patet  et  tralatitiuin  est.  50*