9:79  79  SECUNDA  DEFENSIO  80  communis  sensus  capiet,  vel  ex  philosophicis  scholis  prodibit.  Unde  etiam  apparet,  quam  magnifice  supra  humani  ingenii  captum  coenae  mysterium  extollere  nobis  curae  sit.  Atqui  Westphalus  naturae  conditorem  ex  adverso  loquentem  inducit.  Quid'  autem  loquitur?  Nempe  se  corpus  suum  dare.  Prodeat  ipse  antagonista  ad  evertendam  huius  promissionis  fidem,  quam  nos  reverenter  amplectimur.  Nam  etsi  praeter  panem  et  vinum  nihil  oculi  nostri  conspiciunt,  fide  tamen  vitam  apprehendimus,  quae  ex  Christi  carne  et  sanguine  promanans,  in  animas  usque  nostras  penetrat.  Respondere  nos  ore  Christi  iubet,  fidesne  rationi  carnis,  an  potius  filio  Dei  habenda  sit?  Ego  vero  centies  periisse  malim,  quam  unum  Christi  verbulum  cum  tota  [pag.  76]  philosophia  ad  trutinae  examen  appendere,  sicuti  Westphalus  postulat.  Neque  enim  sacrosancta  modo,  et  αὐτόπιστος  nobis  est  Christi  autoritas,  sed  ad  fraenandos  omnes  hominum  sensus,  totamque  mundi  sapientiam  subigendam  abunde  sufficit.  Longe  inter  nos  aliud  agitur,  fidesne  coelestibus  istis  oraculis  constare  debeat,  sperandam  nobis  resurrectionem  esse,  quae  corpus  nostrum  corruptibile  et  abiectum  conforme  reddat  glorioso  Christi  corpori  (Phil.  3,  21),  venturum  e  coelo  in  nubibus  filium  hominis  ut  mundum  iudicet,  Iesum  Nazarenum,  postquam  in  coelum  ascendit,  venturum  sicut  visus  est  ascendere  (Act.  1,  ll)?  Respondeat  Westphalus,  an  unumquodque  corpus  dio  ultimo  immensum  fore  putet.  Nam  quum  ex  transfiguratis  in  eandem  gloriam  corporibus  nostris,  Christi  potentiam  aestimari  velit  Paulus,  vel  ea  in  nihilum  redigitur,  vel  credere  necesse  est,  non  magis  nunc  immensum  esse  corpus  Christi,  quam  nostra  tunc  futura  sunt.  Quod  de  Christi  in  coelum  ascensu,  de  secundo  eius  adventu  adducimus  ex  scriptura,  secure  Westphalus  deridet,  quasi  probandae  resurrectionis  causa  visibili  forma  in  coelum  sublatum  sit  Christi  [pag.  77]  corpus,  postea  et  formam  et  dimensionem  exuerit.  Atqui  ab  angelis  idem  ab  ascensu  usque  ad  diem  ultimum  status  relinquitur.  Futili  tandem  argutia  nos  eludere  tentat.  Pugnare  enim  cum  physica  nostra  dicit  Pauli  sententiam,  ubi  tradit  Christum  supra  omnes  coelos  ascendisse.  Quid?  an  nos  inter  medias  sphaeras  Christum  locamus?  vel  tugurium  ei  exstruimus  inter  planetas?  Coelum  est  magnificum  Dei  palatium,  toto  mundi  opificio  superius.  Tripudiat  Westphalus,  quod  Christus  secundum  nos  extra  locum  habitet,  quasi  huic  cavillo  opportune  non  fuerit  a  nobis  occursum.  Neque  enim  Christum  sub  pane  delitescere  negamus,  quia  loco  proprie  inclusus  sit,  sed  quia  elementis  omnibus  superior  extra  mundum  habitat.  Excipit  non  magis  cum  physica  pugnare,  corpus  pluribus  in  locis  esse,  quam  nullo  contineri  loco.  Iterum  repeto,  nobis  de  physica  non  esse  certamen,  sed  tantum  hoc  contendere,