8:782  Interroge  quelles  choses  ne  sont  encor  declairees,  respond  quil  entend  ce  que  Calvin  a  parle  du  liberal  arbitre  et  de  la  descente  de  nostre  seigneur  aux  enfers  et  liberation  des  peres,  quil  dict  quo  nest  que  fable,  que  cella  nest  pas  bien  declaire.  Interroge  quil  le  declaire  doncques,  respond  quil  en  a  ia  declaire  en  son  livre,  en  lepistre  18,  et  quil  soffre  en  declairer  davantaige  devant  de  gens  scavans,  quant  plaira  a  messieurs,  par  les  parolles  mesmes  de  nostre  seigneur  Iesus  et  des  sainctes  escriptures  et  des  anciens  docteurs  de  leglise  quil  a  la  riere  soy.  31.  Sus  le  31  respond  quil  ne  le  peult  diviner  si  sa  doctrine  sera  receue  ou  non,  mais  quil  entend  quelle  soit  verite,  iusques  a  ce  quon  luy  monstre  du  contraire,  et  que  du  commencement  telles  choses  sont  reprouvees  que  en  apres  sont  receues.  32.  Sus  le  32  respond  quil  le  peult  et  le  veult  prover  par  les  lieux  allegues  en  la  page  303  de  son  livre  imprime,  selon  la  loy,  et  quil  avoit  dict  que  lon  les  debvoit  punir  selon  que  la  iustice  cognoistroit,  non  pas  mortellement,  mais  comme  en  suet  (sic),  en  gallere,  prison  et  aultres  sortes,  et  quil  nentend  avoir  parle  impertinemment.  33.  Sus  le  33  respond  que  nous  ne  sommes  pas  dessoubz  la  forme  de  iuger  selon  la  loy,  mais  que  la  loy  nous  enseigne  bien  le  peche.  Et  que  cela  nest  point  faulse  doctrine,  pource  que  maintenant  on  ne  iuge  pas  ainsin  que  lon  iugeoit  selon  la  loy,  comment  il  la  monstre  en  lepistre  23  de  son  livre  imprime.  34.  Sus  le  34  respond  quil  lallegue  pretendant  la  gloire  de  nostre  seigneur  Iesus  Christ,  et  lallegue  pource  que  ledict  Alcoran  en  dict  tout  plein  de  bien  et  le  faict  plus  grand  que  de  Mahomet,  et  que  de  Mahomet,  il  ne  sen  vouldroit  ayder  non  plus  que  du  diable.  35.  Sus  le  35  respond  quil  confesse  que  ledict  Alcoran  est  meschant,  mais  quil  ny  a  prins  que  ce  qui  y  estoit  bon.  Et  que  en  ung  meschant  livre,  on  peult  bien  prendre  de  bonnes  choses.  36.  Sus  le  36  respond  que  non.  37.  Sus  le  37  respond  quil  ne  fut  onques  a  Venise,  et  que  dempuys  quil  sortoit  de  prison  il  ne  sortit  iamais  de  france.  38.  Sus  le  38  respond  quil  avoit  couche  le  iour  devant  a  leluyset  (?)  et  arriva  a  pied  tout  seul,  et  quil  loua  encor  un  cheval  a  Salenove.  Et  quil  sen  veult  bien  tenir  a  la  dicte  de  lhoste.  Nest  este  plus  oultre  interrogue,  mais  remys  a  continuer  en  ses  responses  de  iour  en  iour  et  dheure  en  heure  a  la  premiere  venue  de  Messieurs.