23:782  ou  il  nous  commande.  Voila  comme  en  toutes  nos  fascheries,  perplexitez  et  angoisses  il  nous  faut  avoir  nostre  refuge  a  la  Providence  de  Dieu,  sachant  que  c'est  a  luy  de  nous  gouverner:  et  quand  il  disposera  de  nous  selon  sa  volonte,  que  tout  ira  bien,  car  sa  bonte  et  sa  misericorde,  sa  vertu  et  sagesse  seront  pour  nous  conserver.  Et  aussi  a  l'opposite,  quand  nous  serons  en  paix  et  en  repos,  que  nous  ne  laissions  pas  neantmoins  de  nous  tenir  tousiours  sous  ceste  bride,  Qu'il  faut  que  Dieu  provoye:  et  que  nous  ne  soyons  pas  comme  ceux  ausquels  la  graisse  creve  les  yeux,  comme  ceux  qui  sont  pleins  de  fierte.  Quand  les  uns  seront  riches,  les  autres  seront  en  credit  et  en  authorite,  les  autres  auront  support  du  coste  des  hommes,  les  voila  tellement  assoupis  ou  amortis  plustost,  qu'il  ne  pensent  plus  a  la  Providence  de  Dieu:  il  leur  semble  qu'ils  ont  le  vent  en  pouppe,  comme  on  dit.  Or  pour  ceste  cause,  encores  que  Dieu  nous  face  prosperer,  et  que  tout  nous  viene  a*  plaisir,  ne  laissons  pas  de  tousiours  avoir  les  yeux  eslevez  a  la  Providence  de  Dieu,  cognoissans  [pag.  304]  que  tout  bien  vient  de  luy,  et  qu'il  nous  le  pourra  oster  quand  il  luy  plaira,  et  qu'il  le  pourra  aussi  bien  continuer  quand  nous-nous  reposerons  en  luy  seul.  Or  Moyse  adiouste,  qu'on  a  finalement  appele  la  montagne,  Dieu  y  sera  veu.  Il  sembleroit  que  le  nom  eust  este  change  par  erreur,  car  il  y  a  grande  diversite  entre  ces  deux;  choses  :  Que  Dieu  void,  et  Qu'il  soit  veu.  Mais  les  successeurs  ont  voulu  monstrer  que  quand  nous  faisons  cest  honneur  a  Dieu,  d'estre  bien  persuadez  qu'il  void,  c'est  a  dire,  qu'il  a  assez  de  sagesse  pour  nous  conduire,  qu'il  se  monstre  aussi  et  qu'il  a  este  veu  de  nous.  Il  y  a  donc  deux  choses,  comme  nous  en  avons  traitte  ci  dessus  en  parlant  d'Hagar:  car  elle  disoit:  I'ay  veu  apres  celuy  qui  m'a  veu.  Hagar  confessoit  que  Dieu  l'avoit  veue,  mais  c'estoit  lors  qu'elle  n'y  pensoit  point:  et  en  la  fin  elle  a  veu  Dieu,  mais  c'a  este  trop  tard.  Car  Hagar  estoit  la  comme  une  brebis  perdue  et  esgaree:  et  ainsi  il  faut  que  Dieu  la  voye  cependant  qu'elle  ne  pense  point  a  luy.  Or  voici  le  vray  ordre  qu'il  nous  faut  tenir,  c'est  que  nous  cognoissions  que  Dieu  void,  et  cela  emporte  que  nous  le  voyons:  c'est  a  dire,  que  nous  avons  nostre  foy  dressee  a  luy,  et  que  nous  sachions  qu'il  nous  a  pris  en  sa  charge  et  en  sa  protection,  et  que  iamais  ne  nous  mettra  en  [pag,  305]  oubli,  et  qu'il  a  les  moyens  de  nous  secourir  en  toutes  nos  destresses.  Voila  donc  comme  nous  voyons  Dieu  par  foy,  sachans  qu'il  est  assez  provoyable  pour  nous  envoyer  tout  ce  que  besoin  sera,  et  de  nous  retirer  de  toutes  les  miseres  et  povretez  esquelles  nous  sommes,  d'autant  que  nous  sommes  en  sa  main.  Or  avons-nous  commence  par  la,  de  luy  attribuer  ce  titre  et  cest  office  de  Voyant?