51:78  pendant  il  est  borgne,  ce  sera  au  pris  des  aveugles  qu'il  verra  clair:  mais  tant  y  a  qu'il  n'a  pas  la  veue  entiere:  ainsi  de  iuger  par  comparaison,  c'est  une  chose  par  trop  frivole.  Voila  en  somme  ce  que  sainct  Paul  a  voulu  dire.  Il  n'entend  pas  qu'apres  avoir  fait  examen  de  nostre  vie,  nous  ayons  de  quoy  nous  priser  et  nous  faire  valoir:  mais  il  dit  que  toutes  les  louanges  que  les  hommes  s'attribuent  ce  n'est  que  vent  et  fumee,  et  autant  de  mensonges,  d'autant  qu'ils  se  mirent  comme  si  quelqu'un  se  plaisoit  en  son  image.  Voila  un  petit  enfant,  on  luy  monstre  un  miroir,  il  ne  scait  pas  si  c'est  luy  ou  un  autre,  et  toutesfois  il  est  la  du  tout  ravi.  Ainsi  en  est-ii  de  ceux  qui  se  font  accroire  merveilles.  Et  pourquoy?  Sur  quoy  se  fondent-ils,  et  sur  quelle  raison,  sinon  qu'il  leur  semble  qu'ils  valent  mieux  que  ceux  qui  leur  pourroyent  monstrer  le  chemin?  Car  voici  qu'ils  mettront  en  avant,  O,  cestui  la  est  bien  estime,  mais  si  est-ce  qu'il  y  a  telle  chose  et  telle  a  redire.  Tellement  que  quand  on  aura  espluche  les  vices  d'un  homme,  si  on  le  condamne,  on  void  que  ce  n'est  que  ieu  de  petis  enfans.  Non  sans  cause  donc  sainct  Paul  dit  que  pour  faire  l'espreuve  il  nous  faut  esprouver  nous-mesmes  pour  avoir  une  louange  qui  soit  bien  fondee  et  qui  subsiste  devant  Dieu.  Si  on  demande,  Voire  mais  l'homme  se  peutil  louer?  Il  est  certain  qu'il  nous  faut  estre  vuides  de  toute  gloire  pour  practiquer  ce  que  nous  avons  veu  en  l'autre  passage,  ou  il  est  dit  qu'il  nous  faut  glorifier  en  Dieu.  Il  n'est  pas  question  donc  si  les  hommes  pourront  estre  louez  ou  non.  Mais  S.  Paul  par  condition  a  dit  qu'il  faut  que  chacun  pour  estre  prise  de  Dieu  se  retire  comme  en  son  secret,  et  qu'il  ait  recognu  quel  il  est:  et  alors  il  n'y  aura  plus  ces  folies  pour  se  priser  et  pour  dire,  O,  ie  vaux  mieux  que  celui-la:  ie  ne  suis  pas  pire  que  mon  compagnon.  Quand  donc  cela  sera  abatu,  alors  on  verra  s'il  y  doit  avoir  louange  ou  non.  Or  il  est  certain  qu'il  ne  s'en  trouvera  pas  une  seule  goutte,  voire  qui  nous  soit  propre.  Mais  cependant  nous  ne  laisserons  pas  d'avoir  louange  en  nostre  Dieu,  qui  vaudra  beaucoup  mieux  que  si  nous  estions  eslevez  par  dessus  les  nues.  Car  quand  les  hommes  se  decoivent  d'une  vaine  opinion,  ou  bien  que  tout  le  monde  leur  applaudit,  il  semble  bien  qu'ils  volent  en  l'air:  mais  c'est  pour  tresbucher  et  pour  se  rompre  le  col.  Voila  de  quoy  nous  sert  toute  ceste  presomption  qui  nous  aveugle.  Mais  quand  nous  scaurons  que  c'est  de  cercher  louange  en  Dieu,  voila  comme  nous  pourrons  estre  vrayement  conioints  pour  estre  tousiours  bien  appuyez  sur  un  bon  fondement  et  ferme,  pour  estre  prisez  et  louez.  Comme  nous  voyons  que  sainct  Paul  se  glorifie  bien  en  sa  bonne  conscience  et  en  son  integrite:  il  dit  que