42:78  y  en  aura  beaucoup  qui  se  ioindront  a  nous  par  fallace,  et  bien,  tenons  bon  neantmoins,  et  prions  Dieu  qu'il  purge  son  Eglise  de  tous  ses  hipocrites,  qu'il  ne  permette  point  que  telles  ordures  soient  meslees  parmi  ses  enfans.  Nous  avons  donc  a  prier  Dieu  en  cette  sorte,  et  puis  apres  a  mettre  peine  et  diligence,  que  tous  scandales  soient  ostes,  mais  tant  y  ha,  qu'il  nous  faut  souffrir  ce  mal  la,  a  scavoir,  que  Dieu  nous  humilie  quand  il  mesle  parmi  nous  de  telle  infection,  iusques  a  tant  qu'il  nous  en  delivre.  Et  ce  n'est  point  d'auiourd'huy  que  cela  ha  commence,  il  ha  este  de  tout  temps,  et  de  fait,  il  ne  faut  point  trouver  estrange  qu'il  y  en  ait  beaucoup  de  desbauches,  qui  facent  aussi  profession  de  l'Evangile,  car  en  tous  changemens  nous  voions  qu'on  prend  plus  de  licence  beaucoup  qu'on  n'avoit  fait  auparavant,  quand  il  y  avoit  un  estat  paisible,  et  bien,  nul  ne  sonnoit  mot,  mais  s'il  y  ha  quelque  division,  quelque  trouble,  chacun  pense  avoir  conge  de  faire  mal,  comme  en  une  guerre,  ie  vous  prie,  quels  changemens  se  font-ils?  quels  saccagemens,  quels  brigandages,  et  autres  choses  semblables?  Or  maintenant  il  est  certain  qu'il  y  ha  une  guerre  bien  grande  en  la  chrestiente,  car  elle  est  pour  la  doctrine  de  Dieu,  et  c'est  la  guerre  la  plus  grande  qui  scauroit  estre  entre  les  hommes,  comme  aussi  l'Evangile  est  pour  mettre  paix  par  tout,  quand  nous  sommes  reconcilies  a  Dieu,  nous  devons  estre  unis  ensemble  en  un  amour  fraternel.  Au  contraire,  quand  Sathan  s'escarmouche  a  l'encontre  de  Iesus  Christ,  non  seulement  il  ha  la  guerre  contre  luy,  mais  aussi  il  y  ha  une  guerre  des  ennemis  de  la  foy  contre  nous,  et  nous  voions  cela  auiourd'huy,  car  quelle  cruaute  est-ce  qu'exercent  ies  Papistes  a  l'encontre  de  nous,  et  de  nos  freres?  Si  donc  il  y  ha  une  telle  nouveaute  eu  la  chrestiente,  s'il  y  ha  un  tel  trouble,  nous  ne  devons  point  trouver  estrange  si  beaucoup  de  gens  prennent  licence  de  se  desbaucher,  et  usurper  telle  licence  qu'on  voit,  mais  cependant,  o  si  faut-il  que  nous  soions  constans,  que  puis  qu'ainsi  est  que  ceux  qui  nous  ont  precedes,  et  qui  nous  ont  monstre  le  chemin,  ont  este  contraints  de  souffrir  beaucoup  de  ces  canailles  qui  s'estoient  ioints  parmi  eux,  il  faut  auiourd'huy  que  nous  portions  en  patience  cette  condition  telle  qu'ils  l'ont  enduree,  cependant  ce  n'est  pas  a  dire  que  nous  ne  facions  tout  devoir  de  purger  l'Eglise  de  Dieu,  en  tant  qu'en  nous  sera,  de  telles  ordures,  et  le  prier  aussi,  qu'il  y  mette  la  main,  mais  tant  y  ha,  qu'il  ne  nous  faut  point  desesperer  pour  quelque  chose  que  nous  voions.  Cependant  nous  avons  aussi  a  noter,  que  ce  n'est  rien  d'avoir  fait  profession  de  l'Evangile,  car  nous  oions  ce  qui  est  dit  en  ce  passage  par  l'ange  de  Dieu,  que  plusieurs  s'adioindront  au  petit  troupeau,  a  ceux  qui  estoient  comme  la  fleur  des  enfans