30:78  unquam  iniuriam  inultam  relicturum.  Mosen  vero  videmus  etiam  fideliter  mandatum  sibi  a  Domino  fuisse  exsequutum  Deut.  25,  17.  siquidem  nominatim  populum  iubet  memorem  esse  acceptae  istius  ab  Amalecitis  iniuriae,  in  haec  verba:  Recordare  quae  fecit  tibi  Amalech,  in  itinere  quum  exiretis  ex  Aegypto.  Qui  occurrens  tibi  eo  itinere,  in  postremo  agmine  tuo  cecidit  omnes  qui  debilitate  affecti  sequebantur  te,  quum  tu  esses  lassus  et  fatigatus.  nec  reveritus  est  Deum.  Ideo  esto  quum  quietem  dederit  Iehova  Deus  tuus  tibi  ab  omnibus  inimicis  tuis  circumquaque  in  terra  quam  Iehova  Deus  tuus  dat  tibi  in  possessionem,  ut  deleas  memoriam  Hamalechi  sub  coelis:  ne  obliviscitur.  Atqui  labuntur  anni  paene  trecenti,  quibus  Deus  Amalecitas  ita  toleravit  ut  ne  leviter  quidem  attigerit  :  quare  videntur  irritae  illae  comminationes:  et  decretum  illud  Dei  adversus  Amalecitas  tam  horrendum  in  auras  et  fumos  abivisse,  et  irritum  factum  esse.  Nam  quomodo  Deus  tamdiu  tolerat  Amalechitas,  non  repetens  ab  ipsis  istius  iniuriae  rationem,  et  poenas  infligens?  Sed  hic  ea  in  memoriam  revocanda  quae  sacra  pagina  frequenter  inculcat,  mille  annos  esse  coram  Deo  unius  diei  instar.  Unde  etiam  discendum  est,  improbis  triumphantibus,  quod  aliquod  ingens  periculum  evaserint,  Deo  non  properante  ad  vindictam,  et  sua  iudicia  adversus  ipsos  non  exserente:  et  in  summa  laetitia  et  voluptate  ac  otio  vitam  agentibus,  non  modo  reliquos  homines  contemnentibus,  sed  ipsa  Dei  iudicia  spernentibus,  tamen  imminere  Dei  vindictam,  qua  momento  incauti  obruantur.  Iam  vero  in  nostrum  usum  quae  de  Mose  hactenus  sunt  recitata  usurpemus,  et  utilem  ex  iis  doctrinam  eruamus.  Sane  prima  facie  insolens  videri  potest  mandatum,  de  tam  horrenda  vindicta  sumenda  de  Amalechitis:  modum  enim  excedere  modis  omnibus  videtur.  Praeterea  notum  est,  sacram  scripturam  passim  prohibere,  ne  ipsi  nostras  iniurias  ulciscamur.  Quamobrem  sibi  ipsi  Deus  esse  contrarius  forte  videretur  :  quandoquidem  modo  prohibet  ulcisci  iniurias,  modo  etiam  ulcisci  iubet.  Sed  de  ultione  et  vindicta  facilis  solutio  est,  quum  inter  passiones  nostras  distinguemus,  et  sincerum  affectum  Deo  obsequendi.  Sane  si  a  nostris  affectibus  et  passionibus  ad  vindictam  feramur,  certum  est  illicitam  illam  esse  ultionis  rationem.  Quin  imo  licet  manum  adversus  inimicos  non  attollamus,  sed  animo  iracundiam  foveamus,  coram  Deo  caedis  rei  omnino  sumus.  Non  itaque  mirandum  si  Deus  tam  praecise  omnem  ultionem  privatam  prohibuit.  Deus  enim  homines  esse  sui  nimium  amantes  satis  novit,  et  in  iras  ad  minimam  iniuriam  exsurgere:  ac  suis  affectibus  semel  abreptos  non  posse  modum  servare,  sed  iuris  et  aequi  prorsus  oblivisci.  Et  praeterea  Deus  sibi  a  nobis  hunc  honorem  reposcit,  ut  in  ipsius  manus  iniurias  nobis  illatas  reponamus.  Id-