13:78  probare  cogitas,  sic  mihi  persuasi  benigne  a  te  susceptum  iri,  quod  ipsius  nomine  ad  te  scriberem.  Neque  enim  mihi  aliud  proposui,  quam  ut  opus  coeptum  persequendo,  magis  ac  magis  ipsius  gloria  promoveat,  donec  ipsius  regnum  in  optatissimum  illum  statum  perduxeris,  qui  in  terris  exstare  quidem  potest.  Ex  ipsa  porro  lectione  percipies  quam  nihil  de  meo  attulerim,  sed  ex  ipsius  scriptura,  quidquid  hic  habes,  in  usum  tuum  protulerim.  Iam  si  in  unam  magnitudinem  intuerer,  in  quam  istic  evectus  es,  satis  scio  quam  difficilis  ad  illam  aditus  esset  tenuitati  meae  :  quum  vero  non  asperneris  illius  magistri  doctrinam  cui  addictus  sum,  quin  potius  singularis  privilegii  loco  ducas  te  unum  haberi  ex  ipsius  discipulis,  non  est  quod  pluribus  me  apud  te  excusem,  quum  te  satis  bene  comparatum  iudicem  ad  illud  suscipiendum  quod  ab  ipso  profectum  esse  constabit.  Est  sane  de  quo  gratias  agamus  Deo  et  patri  nostro,  quod  opera  tua  uti  voluerit  ad  tantum  opus  ut  per  te  inprimis  purum  et  sincerum  suum  cultum  in  regno  Angliae  restitueret:  praestaret  etiam  ut  salutis  doctrina  audiretur  passim,  et  fideliter  annunciaretur  omnibus  qui  aures  arrigere  dignarentur:  quod  etiam  tantam  fortitudinem  et  constantiam  tibi  indiderit,  ut  contra  tot  insultus  et  difficultates  infracto  animo  pergeres,  ac  manu  potenti  te  asseruerit  hactenus,  ut  tua  consilia  et  labores  sua  benedictione  prosequutus  sit,  atque  prosperaverit.  Totidem,  inquam,  illa  sunt  piis  omnibus  argumenta,  pro  quibus  ipsius  nomen  concelebrent.  Sed  tamen  quia  Satan  totus  in  eo  est,  ut  novas  pugnas  perpetuo  accendat,  ipsaque  illa  res  se  omnium  difficillima  una  est,  dare  operam  nempe  ut  Dei  veritas  placide  apud  homines  obtineat  quum  illi  natura  "mendacio  addicti  sint:  quum  etiam  non  desint  alia  quaedam  quae  ipsius  cursum  remorentur,  ac  nominatim  quod  superstitiones  Antichristi  tam  altas  radices  egerunt,  ut  ex  animis  multorum  aegre  revelli  queant:  tu  unus  mihi  tanto  magis  visus  es  ad  opus  tam  arduum  sanctis  omnino  exhortationibus  confirmandus,  uti  ipsa  experientia  te  hoc  quoque  comperturum  non  dubito.  Atque  hoc  faciet  ut  apertius  hic  et  liberius  me  geram:  et  sane  quia  meum  consilium  voto  tuo,  ut  spero,  respondebit,  sic  statuo  te  etiam  exhortationem  meam  boni  consulturum,  ut  ipsa  non  omnino  necessaria  fuerit,  quum  zelus  et  solicitudo  quae  me  huc  impulerunt  tibi  non  probari  non  possint.  Ac  tanto  magis  illa  quam  ipse  agnoscis  necessitas  faciet,  ut  acceptius  etiam  hoc  apud  te  meum  studium  reddatur.  Quare  a  te  peto,  Amplissime  Domine,  ut  me  hic  patienter  audias  in  iis  de  quibus  te  admonere  paucis  institui  :  ac  vicissim  spero,  ubi  illa  attendens,  ipsa  tibi  solatium  allatura,  quo  animosius  deinde  opus  illud  sanctum  persequaris,  ad  quod  Domino  placuit  te  huc  usque  ministro  uti.